वीरगंज, ०५ फागुन । पर्सा क्षेत्र नं. २ का जनता समाजवादी पार्टी (जसपा) उम्मेदवार अशोक टेमानीले बहुदरमाई नगरपालिका वडा नं. ४ अन्तर्गत डौकैला–बहुवरी चौक क्षेत्रमा घरदैलो कार्यक्रम सम्पन्न गर्दै मतदातासँग प्रत्यक्ष संवाद गरेका छन्।
घरदैलो कार्यक्रमका क्रममा टेमानीले टोल–टोलमा पुगेर स्थानीय बासिन्दा, ज्येष्ठ नागरिक, महिला, युवा तथा किसानहरूसँग प्रत्यक्ष कुराकानी गरेका थिए। कार्यक्रममा सहभागीहरूले खानेपानी, शिक्षा, स्वास्थ्य सेवा र कृषि क्षेत्रसँग सम्बन्धित दैनिक जीवनका समस्याहरू उठाएका थिए।
स्थानीय बासिन्दाका अनुसार गाउँका धेरै स्थानमा स्वच्छ र सुरक्षित खानेपानीको पहुँच छैन। विद्यालयमा पर्याप्त पूर्वाधार र गुणस्तरीय शिक्षाको कमी, शिक्षक अभाव र स्वास्थ्य चौकीको असुविधाले ग्रामीण जीवनमा समस्या बढाएको स्थानीयले बताएका छन्। कृषकहरूले सिँचाइ, मल–बीउ आपूर्तिमा ढिलाइ तथा उपजको उचित बजार नपाउनु जस्ता चुनौतीसमेत उठाएका छन्।
टेमानीले जनताको समस्या आफ्नै समस्या भएको भन्दै त्यसको समाधानका लागि योजनाबद्ध रूपमा अघि बढ्ने प्रतिबद्धता व्यक्त गरे। उनले भने, “म राजनीति गर्न होइन, काम गर्न आएको हुँ। खानेपानी, शिक्षा, स्वास्थ्य र कृषि क्षेत्रमा सुधार बिना ग्रामीण क्षेत्रको समग्र विकास सम्भव छैन।”
उम्मेदवारले स्थानीय पूर्वाधार विकास, रोजगारी सिर्जना, कृषि आधुनिकीकरण तथा गुणस्तरीय शिक्षा–स्वास्थ्य सेवा विस्तारका लागि विशेष पहल गर्ने प्रतिवद्धता जनाए। घरदैलो कार्यक्रममा स्थानीयले टेमानीलाई विकासमुखी नेतृत्वका लागि समर्थन गर्ने आश्वासन दिएका थिए।
यस घरदैलो अभियानसँगै टेमानीले पर्सा क्षेत्र नं. २ का विभिन्न गाउँ–टोलमा आफ्नो चुनावी अभियान थप तीव्र बनाएका छन्। जनमुखी संवादमार्फत मतदातासँगको सम्बन्ध बलियो पार्दै उनले चुनावी अभियानलाई वास्तविक समस्या र विकासमा केन्द्रित बनाउने प्रयास गरिरहेका छन्।
