सेढवा । पर्सा जिल्लाकै ऐतिहासिक तथा धार्मिक महत्व बोकेको जिराभवानी मन्दिरमा आजदेखि महाशिवरात्रि अवसरमा एक साताको मेला सुरु भएको छ। जिराभवानी गाउँपालिका वडा नं. १ र २ को दोसाँधमा रहेको मन्दिरमा बिहानैदेखि भक्तजनहरूको भिड लागेको थियो।
भक्तजनहरूले जल, प्रसाद, फूल, गांजा र किसानले उत्पादन गरेको धानको मुरला चढाएर पूजा अर्चना गरे। भीड नियन्त्रणका लागि मन्दिर संरक्षण समितिले स्वयंसेवक, जनपद प्रहरी र शस्त्र प्रहरी समेत परिचालन गरेका थिए। मन्दिरमा पर्सा, बारा, रौतहट, मकवानपुर, चितवन जिल्लाका साथै भारतको बिहार र उत्तर प्रदेशका भक्तजनहरू समेत दर्शन गर्न आउने गरेका छन्।
जिराभवानी मन्दिर करिब ४०० वर्ष पुरानो प्राचीन स्थल हो। प्रारम्भमा मन्दिर क्षेत्र जंगलले घेरिएको थियो र थारु समुदायको बसोबास थियो। परम्पराअनुसार, ग्रामिण किसानहरूले आफ्नो मुख्य बाली धानको केही अंश मन्दिरमा अर्पण गर्ने चलन रहेको छ।
मन्दिर क्षेत्रमा कृषि, व्यापारिक र सामाजिक सम्बन्धमा पनि महत्वपूर्ण भूमिका खेल्दै आएको जनाइएको छ। मन्दिर परिसरको करिब १० बिघा जग्गामा स्थानीय पहलमा बगैचा, पर्खाल, बिबाह मण्डप, चौतारा र प्रतिक्षालय निर्माण गरिएको छ। संघीयता लागू भएपछि स्थानीय तथा प्रदेश सरकारले मन्दिर संरचना र विकासमा पहल गर्न थालेका छन्।
हाल मन्दिर संरक्षण र व्यवस्थापनको लागि दुई वर्षअघिदेखि वैधानिक समिति पनि गठन गरिएको छ। मेलाले भक्तजनको आस्था र समुदायको सांस्कृतिक परम्परालाई जीवित राख्दै, ग्रामिण किसानलाई कृषि तथा घरेलु सामग्री खरीद गर्ने अवसर समेत प्रदान गरेको छ।
