वीरगंज । वीरगंज महानगरपालिका वडा नम्बर–२६ सुगौली बिर्तामा नेकपा (एमाले) पर्सा निर्वाचन क्षेत्र नम्बर–२ द्वारा आयोजित रात्री सभा सम्पन्न भएको छ। सभालाई सम्बोधन गर्दै प्रतिनिधिसभा सदस्य उम्मेदवार रिमा यादवले महिलाको हक–अधिकार सुनिश्चित गर्नु वर्तमान आवश्यकता रहेको बताइन्।
उम्मेदवार यादवले महिलालाई आर्थिक, सामाजिक तथा राजनीतिक रूपमा सशक्त बनाउन शिक्षा, सीपमूलक तालिम तथा स्वरोजगारका अवसर विस्तार गर्नुपर्नेमा जोड दिइन्। “महिला शिक्षालाई प्राथमिकता दिएर मात्रै समाजको समग्र विकास सम्भव हुन्छ,” उनले भनिन्। साथै उनले आधुनिक शिक्षा प्रणाली, प्राविधिक ज्ञान र रोजगारीमुखी तालिममार्फत युवालाई स्वदेशमै अवसर सिर्जना गर्ने योजना रहेको उल्लेख गरिन्।
कार्यक्रममा एमालेका केन्द्रिय सदस्य विजय सरावगी, मधेस प्रदेशका उपाध्यक्ष बिचारी यादव र नेता मुकेश दुबेदी लगायतका वक्ताहरूले देश विकास, स्थायित्व र सुशासनका लागि एमाले नेतृत्व आवश्यक रहेको धारणा राखे। उनीहरूले संगठन सुदृढ गर्दै आगामी निर्वाचनमा पार्टीलाई विजयी बनाउन सबै कार्यकर्ता एकजुट भएर लाग्नुपर्ने बताए।
त्यसैगरी, कार्यक्रममा एमाले वीरगंज महानगर कमिटीका कार्यवाहक अध्यक्ष लियकत अली र लेखा समिती संयाेजक अजय साह लगायत स्थानीय नेता तथा कार्यकर्ताको उल्लेख्य उपस्थिति रहेको थियो।
सहभागी वक्ताहरूले स्थानीय विकास, पूर्वाधार विस्तार, कृषि आधुनिकीकरण तथा युवा रोजगारी सिर्जनालाई प्राथमिकतामा राख्नुपर्ने धारणा व्यक्त गरेका थिए।
