वीरगंज । पर्सा निर्वाचन क्षेत्र नम्बर–१ अन्तर्गत जनमत पार्टीका उम्मेदवार ओमप्रकाश सरार्फले वीरगन्ज महानगरपालिका वडा नम्बर–१८ भवानीपुर, इनर्वा तथा वडा नम्बर–२२ जगरनाथपुरमा भेटघाट, संवाद तथा घरदैलो कार्यक्रम सम्पन्न गरेका छन्।
कार्यक्रमका क्रममा उम्मेदवार सरार्फले मधेस आन्दोलन र जेन्जि आन्दोलनका क्रममा निर्दोष युवाहरूको हत्या गर्ने नेपाली कांग्रेस, नेकपा एमाले लगायत ठूला दल र तिनका उम्मेदवारहरूलाई मतपत्र (ब्यालेट) को माध्यमबाट सजाय दिनुपर्ने बेला आएको बताए। उनले जनताको अदालतमा ती दलहरूलाई बहिष्कार गर्दै खबरदारी गर्नुपर्नेमा जोड दिए।
सरार्फले देश र मधेसको राजनीतिक निकासका लागि स्पष्ट र उत्कृष्ट भिजन जनमत पार्टी र पार्टी अध्यक्ष डा. सीके राउतसँग मात्रै रहेको दाबी गर्दै हर्न छापमा मतदान गर्न मतदातासँग आग्रह गरे।
घरदैलो तथा संवाद कार्यक्रममा जनमत पार्टीका नेताहरू रम्भा मिश्रा, भुपेन्द्र साह, डा. मनोज कुमार, सीए देवराज, महादेव शर्मा, निराजन कुशवाहा, सहनवाज राकी, अजित सिंह, मन्जय शर्मा, सुमित सिंह, नागेन्द्र सिंह, अञ्जना गुप्ता, नजमा खातुन, अनिता रौनियार लगायतको उल्लेखनीय सहभागिता रहेको थियो।
कार्यक्रममा स्थानीयवासीहरूले मधेसका मुद्दा, सुशासन र युवाको भविष्यबारे चासो व्यक्त गर्दै उम्मेदवार सरार्फसँग प्रत्यक्ष संवाद गरेका थिए।
