वीरगंज । पर्सा निर्वाचन क्षेत्र नं. २ अन्तर्गत बीरगंज महानगरपालिका वडा नं. २६ सुगौली विर्तामा राष्ट्रिय स्वतन्त्र पार्टी (रास्वपा) का प्रतिनिधिसभा सदस्य पदका उम्मेदवार सुशील साह कानुले घरदैलो गरेका छन् ।
घरदैलो क्रममा उम्मेदवार कानुले स्थानीय मतदातासँग प्रत्यक्ष भेटघाट गर्दै उनीहरूको समस्या, आवश्यकता र अपेक्षाबारे जानकारी लिएका थिए । सो अवसरमा उनले सुशासन, पारदर्शिता, रोजगारी सिर्जना तथा विकासका विषयमा रास्वपाको धारणा राख्दै जनताको पक्षमा इमान्दार राजनीति गर्ने प्रतिबद्धता व्यक्त गरे ।
स्थानीयवासीहरूले शिक्षा, स्वास्थ्य, सरसफाइ, रोजगारी तथा आधारभूत पूर्वाधारका विषयमा आफ्ना गुनासा तथा सुझाव राखेका थिए । उम्मेदवार कानुले ती समस्याहरू संसदमार्फत उठाउने र समाधानका लागि पहल गर्ने विश्वास दिलाएका छन् ।
घरदैलो कार्यक्रममा रास्वपाका स्थानीय नेता–कार्यकर्ता, समर्थक तथा सर्वसाधारणको उल्लेख्य सहभागिता रहेको थियो ।
