वीरगंज । पर्सा क्षेत्र नं. १ मा चार सयभन्दा बढी जेन्जी युवाहरू राष्ट्रिय स्वतन्त्र पार्टी (रास्वपा) मा प्रवेश गरेका छन् ।
शनिबार वीरगंजस्थित रोयल पार्टी प्यालेसमा आयोजित पार्टी प्रवेश कार्यक्रममा जेन्जी युवा नेता परबेज सेखको नेतृत्वमा कमलेश पटेल, रञ्जित साह कलवार, साहिल सेख, सन्नी अली, आनन्द चौहान, अजय पण्डित, सेख अल्ताफ, प्रियन्जन यादव, सञ्जीत साह, दानिश सेखलगायतका चार सयभन्दा बढी युवाहरू रास्वपामा प्रवेश गरेका हुन् ।
पार्टी प्रवेश कार्यक्रमलाई सम्बोधन गर्दै जेन्जी युवा नेता परबेज सेखले राष्ट्रिय स्वतन्त्र पार्टीले मात्र मुलुकमा वास्तविक परिवर्तन ल्याउन सक्ने बताए । पर्साका जेन्जी युवाहरू परिवर्तनको पक्षमा उभिएको उल्लेख गर्दै उनले अब पर्सामा रास्वपालाई विजयी गराउन सम्पूर्ण जेन्जी युवा शक्ति सक्रिय भएर लाग्ने प्रतिबद्धता जनाए ।
उनले जेन्जी युवा नेताहरू सुदन गुरुङ, पुरुषोत्तम यादवलगायतका प्रमुख जेन्जी नेताहरू पहिल्यै रास्वपामा प्रवेश गरिसकेको स्मरण गराउँदै जेन्जी आन्दोलनलाई सम्बोधन गर्न सक्ने पार्टी रास्वपा मात्र भएको कारण आफूहरूको रोजाइ यही पार्टी बनेको स्पष्ट पारे ।
कार्यक्रमलाई सम्बोधन गर्दै रास्वपाका पर्सा जिल्ला सभापति तथा पर्सा क्षेत्र नम्बर–१ का प्रतिनिधिसभा सदस्य उम्मेदवार हरि पन्तले जेन्जी युवाहरू नै पार्टीको सबैभन्दा ठूलो शक्ति र सम्पत्ति भएको बताए । युवाहरूको साथ र विश्वास पाएकाले आफू ढुक्कका साथ चुनाव जित्ने दाबी गर्दै उनले चुनावमा हुने पैसाको चलखेललाई कानुनसम्मत तरिकाले रोक्न युवाहरूलाई सक्रिय भूमिका खेल्न निर्देशन समेत दिए ।
कार्यक्रम रास्वपा वीरगंज महानगर सभापति अमन आलमको सभापतित्वमा सम्पन्न भएको थियो ।
