वीरगंज । राष्ट्रिय स्वतन्त्र पार्टी (रास्वपा) ले आगामी फागुन २१ गते हुने प्रतिनिधिसभा सदस्य निर्वाचनका लागि पर्सा जिल्लाका चार निर्वाचन क्षेत्रमध्ये तीन वटामा उम्मेदवारको टुङ्गो लगाएको छ । रास्वपाका केन्द्रीय सदस्य नन्दन यादवका अनुसार पार्टीले पर्सा क्षेत्र नम्बर १, ३ र ४ मा उम्मेदवार निश्चित गरेको हो ।
पार्टीको निर्णयअनुसार पर्सा क्षेत्र नम्बर १ बाट होटल व्यवसायी तथा रास्वपाका जिल्ला सभापति हरि पन्तले टिकट पाएका छन् । यसअघि सो क्षेत्रमा नेकपा एमालेबाट रास्वपामा प्रवेश गरेका शम्भु गुप्ताको नाम चर्चामा रहे पनि अन्ततः पार्टीले पन्तलाई नै चुनावी मैदानमा उतार्ने निर्णय गरेको हो ।
त्यस्तै, पर्सा क्षेत्र नम्बर ३ बाट निर्माण व्यवसायी रामाकान्त चौरसिया र क्षेत्र नम्बर ४ बाट टेकबहादुर शाक्य उम्मेदवार चयन भएका छन् । यसअघि क्षेत्र नम्बर ३ मा रुपेश पाण्डे र क्षेत्र नम्बर ४ मा रहबर अन्सारीको नाम चर्चा चले पनि अन्ततः चौरसिया र शाक्यले नै टिकट पाएका हुन् ।
पर्सा क्षेत्र नम्बर २ मा भने उम्मेदवार चयन प्रक्रिया अझै पेचिलो बनेको छ । सो क्षेत्रबाट वीरगंज महानगरपालिका–१० का वडाध्यक्ष सुशील साह कानुको नाम निकै चर्चामा रहे पनि पार्टीले अहिलेसम्म आधिकारिक घोषणा गरेको छैन ।
वडाध्यक्ष कानुसँगै प्रमेश्वर कलवार र परबेज अख्तरले पनि टिकटमा दाबी नछाडेकाले निर्णय प्रक्रिया लम्बिएको केन्द्रीय सदस्य यादवले जानकारी दिए ।“क्षेत्र नम्बर २ का विषयमा आज बिहान पुनः छलफल गरी उम्मेदवारको टुङ्गो लगाइनेछ,” यादवले बताए ।
नयाँ शक्ति र वैकल्पिक राजनीतिको नारासहित चुनावी मैदानमा उत्रिएको रास्वपाले पर्सामा उम्मेदवार छनोट गर्दा स्थानीय प्रभाव, संगठन क्षमता र व्यावसायिक पृष्ठभूमिका व्यक्तिहरूलाई प्राथमिकता दिएको देखिन्छ ।
