वीरगञ्ज । राष्ट्रिय स्वतन्त्र पार्टी (रास्वपा) का मधेस प्रदेश अभियान तथा प्रचार–प्रसार विभागका सदस्य रामकुमार सर्राफ र पर्सा निर्वाचन क्षेत्र नम्बर ४ का क्षेत्रीय सभापति जितेन्द्र मिश्र ले प्रतिनिधिसभा सदस्य पदका लागि पार्टीले टिकट दिने उम्मेदवारलाई पूर्ण रूपमा सघाउने प्रतिबद्धता व्यक्त गरेका छन्।
पार्टीभित्र टिकट वितरणको विषयलाई लिएर केही स्थानमा असन्तुष्टि र आरोप देखिएको पृष्ठभूमिमा उनीहरूले पर्सा जिल्लामा पार्टीले उम्मेदवार बनाउने जो–कोहीलाई पनि एकताबद्ध रूपमा सहयोग गरिने स्पष्ट पारेका हुन्। उनीहरूले पार्टीको निर्णय नै सर्वोपरि हुने उल्लेख गर्दै नेतृत्वले उम्मेदवारको क्षमता, जनआधार र जित्ने सम्भावनालाई आधार मानेर नै टिकट वितरण गरेको विश्वास व्यक्त गरे।
रामकुमार सर्राफले रास्वपा कुनै व्यक्ति केन्द्रित नभई विचार र प्रणालीमा आधारित पार्टी भएको स्पष्ट पार्दै भने, “रास्वपा कुनै व्यक्ति केन्द्रित पार्टी होइन। पार्टीले जसलाई उम्मेदवार बनाउँछ, उसलाई जिताउनु हामी सबैको साझा दायित्व हो।”
त्यस्तै, क्षेत्रीय सभापति जितेन्द्र मिश्रले पार्टीभित्र देखिने असहमति स्वाभाविक प्रक्रिया भए पनि अन्ततः सबै नेता तथा कार्यकर्ताले पार्टीको निर्णयअनुसार अघि बढ्नुपर्नेमा जोड दिए। “हामी कार्यकर्ता हौँ, पार्टीको जित नै हाम्रो जित हो,” मिश्रले भने।
उनीहरूले पर्सा जिल्लाका चारै निर्वाचन क्षेत्रमा पार्टीका उम्मेदवारहरूलाई सहयोग गर्दै सकारात्मक नतिजा ल्याउन हरसम्भव प्रयास गरिने प्रतिबद्धता जनाएका छन्। साथै, जनकपुरधाम लगायतका स्थानमा टिकट वितरणलाई लिएर भइरहेको विरोध प्रदर्शन अन्त्य गर्दै भोलिदेखि नै सक्रिय रूपमा चुनावी अभियानमा लाग्न नेता–कार्यकर्तालाई आग्रह गरेका छन्।
रास्वपाले पहिलो पटक मधेसी मूलका व्यक्तिलाई भावी प्रधानमन्त्रीको रूपमा अघि सारेको उल्लेख गर्दै सर्राफ र मिश्रले यो अभियान केवल निर्वाचनमा सीमित नभई समावेशी नेतृत्व र राजनीतिक परिवर्तनको अभियान भएको बताए। उनीहरूले आ–आफ्नो स्थानबाट पार्टीका उम्मेदवारलाई जिताउन सबै नेता तथा कार्यकर्तालाई एकताबद्ध भएर लाग्न अपिल गरेका छन्।
