वीरगंज । पर्सा निर्वाचन क्षेत्र नम्बर १ मा राष्ट्रिय स्वतन्त्र पार्टी (रास्वपा) ले शम्भु प्रसाद गुप्तालाई प्रतिनिधिसभा सदस्य पदको उम्मेदवार बनाउने तयारी अन्तिम चरणमा पुर्याएको छ।
आगामी फागुन २१ गते हुने प्रतिनिधिसभा निर्वाचनका लागि उपयुक्त उम्मेदवारको खोजीमा रहेको रास्वपाले अन्ततः गुप्ताको नाममा सहमति जुटाएको पार्टी निकट स्रोतले जनाएको छ।
स्रोतका अनुसार गुप्ता हाल जनकपुरधाम मा रहेका छन्। त्यहाँ चुनावी सभाका क्रममा पुगेका रास्वपा सभापति रवि लामिछाने र वरिष्ठ नेता बालेन्द्र शाह सँग उम्मेदवारीबारे निर्णायक छलफल भइरहेको बताइएको छ। उक्त छलफलबाट उम्मेदवारीको अन्तिम टुंगो लाग्ने संकेत देखिएको छ।
यसअघि रास्वपाले पर्सा–१ बाट संविधानसभा सदस्य अजय द्विवेदीलाई उम्मेदवार बनाउने प्रयास गरेको थियो। तर द्विवेदीले नेपाली काँग्रेसबाट टिकट नपाएपछि मात्र रास्वपामा प्रवेश गर्ने सर्त राखेपछि पार्टी नेतृत्व पछि हटेको स्रोतको दाबी छ।
गुप्ता नेकपा (एमाले) परित्याग गरी रास्वपामा प्रवेश गर्न लागेका हुन्। उनी २०७४ सालको प्रदेशसभा निर्वाचनमा एमालेको तर्फबाट पर्सा १ (२) बाट उम्मेदवार बनेका थिए। उक्त निर्वाचनमा उनी मधेशका तत्कालीन मुख्यमन्त्री लालबाबु राउत सँग पराजित भएका थिए।
चुनावी तयारीकै क्रममा गुप्ताले वीरगञ्ज महानगरपालिका को जागिरबाट राजीनामा दिएका थिए। त्यसपछि उनी उपेन्द्र यादव नेतृत्वको सङ्घीय समाजवादी फोरम नेपालमा प्रवेश गरे पनि टिकट नपाउने निश्चित भएपछि अन्तिम समयमा एमालेबाट चुनाव लडेका थिए। २०७९ को निर्वाचनमा भने उनले प्रत्यक्ष उम्मेदवारी नदिई एमालेका उम्मेदवारलाई सहयोग गरेका थिए।
एमाले निकट बुद्धिजीवी सङ्गठनका मधेश प्रदेश अध्यक्षसमेत रहेका गुप्ता व्यावसायिक पृष्ठभूमिका व्यक्ति हुन्। वीरगञ्ज महानगरपालिका–१२ का स्थायी बासिन्दा उनले विभिन्न सहकारी संस्थामा सञ्चालकको भूमिका निर्वाह गर्दै आएका छन्। साथै, वीरगञ्ज–१२ मै निजी विद्यालय र कलेज सञ्चालन गर्दै आएका छन्।
यसअघि पर्सा–१ बाट रास्वपाका जिल्ला सभापति बुद्धिप्रसाद (हरि) पन्त तथा वीरगञ्ज हेल्थ केयर अस्पतालका सञ्चालक अबुलहैस अन्सारीलगायतका नामहरू पनि सम्भावित उम्मेदवारका रूपमा चर्चामा थिए। तर पार्टी निकट स्रोतका अनुसार अन्ततः रास्वपाले शम्भु प्रसाद गुप्ताकै नाममा सहमति जुटाएको हो ।
यद्यपि, रास्वपाको तर्फबाट गुप्ताको उम्मेदवारीबारे औपचारिक घोषणा हुन भने बाँकी नै छ।
