वीरगंज । हरिखेतान क्याम्पस मा लामो समयदेखि देखिँदै आएको शैक्षिक, प्रशासनिक तथा विद्यार्थीसम्बन्धी गम्भीर समस्या समाधानप्रति सम्बन्धित निकाय उदासीन बनेको आरोप लगाउँदै विद्यार्थी पक्षले निर्णायक आन्दोलनको चेतावनी दिएको छ।
विद्यार्थीहरूले क्याम्पसका समस्या समाधानका लागि जिल्ला प्रशासन कार्यालय पर्सा का प्रमुख जिल्ला अधिकारीसमक्ष यसअघि नै औपचारिक रूपमा ज्ञापनपत्र बुझाइसकेको भए पनि हालसम्म कुनै ठोस परिणाम नआएको भन्दै गहिरो असन्तुष्टि व्यक्त गरेका छन्। प्रमुख जिल्ला अधिकारीले १० दिनभित्र क्याम्पस व्यवस्थापन समिति, शिक्षक तथा विद्यार्थी प्रतिनिधिसँग संयुक्त छलफल गरिने आश्वासन दिएको भए पनि सो प्रतिबद्धता कार्यान्वयन नभएको विद्यार्थीको भनाइ छ।
विज्ञप्तिमा क्याम्पस व्यवस्थापन समितिको चरम लापरबाही, प्रशासनिक गैरजिम्मेवारी र विद्यार्थी अधिकारप्रति गरिएको खुला बेवास्ता स्पष्ट देखिएको आरोप लगाइएको छ। साथै क्याम्पसमा प्रदान गरिने भनिएको छात्रवृत्ति सरकारी नभई निजी संस्थाबाट आएको हुन सक्ने गम्भीर आशंका रहेकाले सो प्रकरणको निष्पक्ष छानबिन तत्काल सुरु गर्नुपर्ने, विद्यार्थीका जायज मागहरू स्पष्ट रूपमा सार्वजनिक गरी कार्यान्वयन प्रक्रिया अघि बढाउनुपर्ने तथा हरिखेतान क्याम्पसमा व्याप्त शैक्षिक, प्रशासनिक, सुरक्षा र विद्यार्थीसम्बन्धी सम्पूर्ण समस्या समाधानतर्फ ठोस पहल गर्नुपर्ने माग विद्यार्थी पक्षले अघि सारेको छ।
शैक्षिक अवस्था दिनप्रतिदिन कमजोर बन्दै जानु, शिक्षक–विद्यार्थीबीच बढ्दो तनाव, आवागमन तथा सुरक्षासम्बन्धी समस्या यथावत् रहनु गम्भीर विषय भएको उल्लेख गर्दै बारम्बार ‘धैर्य गर्नुस्’ भन्ने बहानामा समय बिताउने प्रवृत्ति अब स्वीकार्य नहुने चेतावनी दिइएको छ।
विद्यार्थी पक्षले आजको मितिले तीन दिनभित्र आफ्ना मागहरू सम्बोधन नभए हरिखेतान क्याम्पसको पठन–पाठनसहित सम्पूर्ण प्रशासनिक गतिविधि पूर्ण रूपमा बन्द गरी आन्दोलनलाई जिल्ला हुँदै केन्द्रीय तहसम्म विस्तार गरिने स्पष्ट चेतावनी विज्ञप्तिमार्फत दिएको छ।
