वीरगंज । आगामी फागुन २१ गते हुने प्रतिनिधि सभा सदस्य निर्वाचन नजिकिँदै जाँदा पर्सा क्षेत्र नं. ४ मा चुनावी सरगर्मी बढ्दै गएको छ। जिल्लाका अन्य क्षेत्रजस्तै यहाँ पनि अधिकांश पुरानै राजनीतिक अनुहारहरू देखिएका छन् भने केही नयाँ अनुहारहरू मात्र मैदानमा उत्रने तयारीमा छन्।
शीर्ष ठूला राजनीतिक दलहरूले उम्मेदवारका नाम केन्द्रमा सिफारिस गरिसकेका छन् भने उम्मेदवार बन्न चाहने नेताहरू टिकटका लागि आन्तरिक लबिङ र पहलमा जुटेका छन्।
नेपाली कांग्रेसले यसपटकको निर्वाचनमा पनि पूर्व मन्त्री तथा निर्वतमान प्रतिनिधि सभा सदस्य रमेश रिजालको एकल नाम सिफारिस गरेको छ। एकल सिफारिस भएकाले रिजाल पुनः कांग्रेसको उम्मेदवार हुने लगभग निश्चित देखिएको छ।
नेकपा एमालेबाट जालिम मियाँ, बिरेन्द्र यादव र गोकुली कुमारी रेग्मीको नाम सिफारिस गरिएको छ। अघिल्लो निर्वाचनमा पनि एमालेबाट उम्मेदवार बनेका जालिम मियाँ कांग्रेसका रमेश रिजालसँग पराजित भएका थिए। यसपटक पनि सिफारिस भएकामध्ये मियाँले नै एमालेको टिकट पाउने सम्भावना बलियो रहेको एमाले स्रोतले जनाएको छ।
प्रचण्ड र माधव नेपाल नेतृत्वको नेपाली कम्युनिष्ट पार्टी (नेकपा) बाट बलिराम साह, जयप्रकाश थारु र मेनेजर साहको नाम सिफारिस भएको छ। पहिलो नम्बरमा सिफारिस भएका बलिराम साह माओवादीका पुराना नेता हुन् भने दोस्रो नम्बरमा रहेका जयप्रकाश थारु केही दिनअघि मात्र एमाले परित्याग गरी नेकपामा प्रवेश गरेका नेता हुन्। यी दुईमध्ये एकले टिकट पाउने सम्भावना रहेको छ।
राष्ट्रिय स्वतन्त्र पार्टी (रास्वपा) बाट विवेकानन्द प्रसाद, टेकबहादुर शाक्य, अजय यादव, युगल किशोर पाण्डे र मनिष किशोर श्रीवास्तव उम्मेदवार बन्न इच्छुक देखिएका छन् । यीमध्ये एक जनाले पर्सा–४ बाट रास्वपाको टिकट पाउने पार्टी स्रोतले जनाएको छ।
यसैगरी जनता समाजवादी पार्टी (जसपा) नेपालबाट डा. कृपासिन्धु प्रसाद चौधरी र लोकतान्त्रिक समाजवादी पार्टी (लोसपा)बाट लक्ष्मण लाल कर्णको नाम सिफारिस भएको छ। जसपा र लोसपा बीच एकता भइसकेकाले यी दुईमध्ये एक जनाले मात्र संयुक्त रूपमा टिकट पाउने छन्। जसपाबाट सिफारिस भएका चौधरी कांग्रेसका पूर्व नेता हुन् भने लोसपाबाट सिफारिस भएका कर्ण पूर्व मन्त्री तथा पूर्व सांसदसमेत हुन्। कर्ण २०७४ को निर्वाचनमा पर्सा–४ बाट निर्वाचित भएका थिए।
यसैगरी जनमत पार्टीबाट सीमा गुप्ता र आम जनता पार्टी (आजपा)बाट इमदाद गद्दी चुनावी मैदानमा उत्रने भएका छन्। जन अधिकार पार्टी नेपालका अध्यक्षसमेत रहेका गद्दी र आजपाका अध्यक्ष प्रभु साहबीच आजपाको चुनाव चिह्नबाट चुनाव लड्ने सहमति केही दिनअघि भएको थियो।
यसका अतिरिक्त अन्य साना दलबाट पनि उम्मेदवार हुन सक्ने सम्भावना रहेको छ। उम्मेदवार मनोनयन दर्ताको समय नजिकिँदै जाँदा सबै दल उम्मेदवार छनोट र सम्भावित चुनावी तालमेलमा व्यस्त देखिएका छन्। निर्वाचन तालिकाअनुसार उम्मेदवार मनोनयन दर्ता यही माघ ६ गते तोकिएको छ।
