वीरगंज । संविधानसभाका सदस्य जयप्रकाश थारु नेकपा (एमाले) परित्याग गरी पुष्पकमल दाहाल ‘प्रचण्ड’ र माधवकुमार नेपाल नेतृत्वको नेपाली कम्युनिस्ट पार्टी (नेकपा)मा प्रवेश गरेका छन्।
एमाले पार्टी नेतृत्वप्रति असन्तुष्टि जनाउँदै थारुले पार्टी छोड्ने निर्णय गरेका हुन्। उनीसँगै पर्सा निर्वाचन क्षेत्र नम्बर ४ का सयौँ नेता तथा कार्यकर्ता पनि एमाले परित्याग गरी नेकपामा सामेल भएका छन्।
थारुसँगै शालीन नेता लेखमान थापा, एमाले मधेश प्रदेश कमिटी सदस्य हरिन्द्र हाजारा, नेता नजमुदिन राउत गद्दी, विजय महतो थारु, कमल दास तात्वा, हरिशंकर पंजियार, रामजनम खवास, श्रीकान्ती देवी थारु, उर्मिला चौधरी, कुनाल थारुलगायतका नेता तथा कार्यकर्ता नेकपामा प्रवेश गरेको नेकपाका केन्द्रीय सदस्य नागेन्द्र चौधरीले जानकारी दिएका छन्।
उनीहरू नेकपाको केन्द्रीय कार्यालय पेरिसडाँडामा आज आयोजित विशेष समारोहमार्फत औपचारिक रूपमा पार्टी प्रवेश गरेका हुन्।
नेकपा (एमाले) पर्साका पूर्व अध्यक्षसमेत रहेका थारु दोस्रो संविधानसभा निर्वाचनमा पर्सा निर्वाचन क्षेत्र नम्बर ५ बाट नेपाली काँग्रेसका रमेश रिजाललाई पराजित गर्दै विजयी भएका थिए। त्यसपछि भएका दुवै निर्वाचनमा भने उनी पर्सा निर्वाचन क्षेत्र नम्बर ४ (१) बाट प्रदेशसभा सदस्य पदमा नेपाली काँग्रेसका शंकर चौधरीसँग पराजित हुँदै आएका छन्।
थारुको नेकपा प्रवेशले पर्सा जिल्लाको कम्युनिस्ट राजनीतिमा नयाँ तरङ्ग ल्याउने अनुमान गरिएको छ। यसअघि पनि पर्सा निर्वाचन क्षेत्र नम्बर ३ बाट मधेश प्रदेशका पूर्व प्रदेशसभा सदस्य प्रह्लाद गिरी, बिन्दवासिनी गाउँपालिकाका पूर्व अध्यक्ष श्रीलाल साह कानुसहित सयौँ नेता तथा कार्यकर्ता एमाले त्यागेर नेकपामा प्रवेश गरिसकेका छन्।
