सेढवा । पर्साको ठोरी गाउँपालिकामा आज सार्वजनिक सुनुवाइ कार्यक्रम सम्पन्न भएको छ। ठोरी गाउँपालिका र जिल्ला प्रशासन कार्यालय पर्साको संयुक्त आयोजनामा वडा नं. ४ घ्याङ्गडाडाको खेलमैदानमा सम्पन्न कार्यक्रममा स्थानीय सेवा प्रवाहका बिषयमा नागरिकहरूले खुला रूपमा गुनासो र सुझाव राखेका छन्।
वडा नं. ४ का वडाध्यक्ष मानबहादुर थिङ्गको सभापतित्व तथा गाउँपालिका अध्यक्ष लालबहादुर श्रेष्ठको प्रमुख आतिथ्यमा आयोजित कार्यक्रममा सहभागी नागरिकहरूले इलाका प्रशासन कार्यालय सुपौलीबाट प्रदान गरिने सेवामा देखिएका कठिनाइबारे तीखा प्रश्न उठाए।
नागरिकता प्रमाणपत्र, प्रतिलिपि, राष्ट्रिय परिचयपत्र लगायतका सेवा लिन जाँदा कर्मचारी तथा दलालले हजारौं रुपैयाँ असुल्ने गरेको, घुस नदिए महिनौँसम्म काम नहुने अवस्थाले सर्वसाधारण पीडित भएको गुनासो राखिएको थियो।
सवालको जवाफ दिने क्रममा जिल्ला प्रशासन कार्यालय पर्साका सूचना अधिकारी तथा इलाका प्रशासन कार्यालय सुपौलीका शाखा अधिकृत विनय कुमार गुप्ताले कार्यालयमा घुस–घुसियाकै गतिविधि नरहेको दाबी गरे। आफूलाई कुनै आधिकारिक गुनासो नआएको उल्लेख गर्दै, यस्तो कार्य भएको प्रमाण भेटिए कडा कारबाही हुने चेतावनी पनि दिए।
कार्यक्रममा उपाध्यक्ष गोकुली कुमारी रेग्मी, प्रमुख प्रशासकीय अधिकृत सरोज कुमार चौधरी, जनप्रतिनिधि, सञ्चारकर्मी तथा स्थानीयवासीको सक्रिय सहभागिता रहेको थियो।
