वीरगंज । जिल्ला प्रहरी कार्यालय पर्साले ९ केजी ३८० ग्राम लागुऔषध (गाँजा) सहित ३ जना भारतीय नागरिकलाई पक्राउ गरेको छ ।
विशेष सूचनाको आधारमा प्रहरी चौकी मनवाबाट खटिएको टोलीले कार्तिक २६ गते दिउँसो करिब १२:०० बजेतिर पर्सागढी नगरपालिका–९ बडेर्वा पेट्रोलपम्प नजिक सडकखण्डमा नेपालबाट भारततर्फ संकास्पद रूपमा हिँडिरहेका तीन जनालाई रोकी खानतलासी गर्दा गाँजा जस्तो देखिने पदार्थ फेला परेको हो।
पक्राउ परेकामध्ये भारत विहारको बैशाली जिल्ला, विदुपुर ग्राम बस्ने २३ वर्षका राजा कुमारको साथबाट प्लास्टिकसहित ३ केजी १९० ग्राम गाँजा, राजामाइकल पञ्चायत बस्ने २३ वर्षका बिशाल कुमारको साथबाट ३ केजी २५० ग्राम गाँजा, र छपरा जिल्ला सोनपुर ग्राम–३ बस्ने २४ वर्षका पिन्टु कुमारको साथबाट ३ केजी ३०० ग्राम गाँजा फेला परेको प्रहरीले जनाएको छ। यसरी जम्मा प्लास्टिक बाहेक ९ केजी ३८० ग्राम गाँजा बरामद गरिएको हो।
पक्राउ परेका तिनै जनालाई लागुऔषधसहित नियन्त्रणमा लिई जिल्ला प्रहरी कार्यालय, पर्सामा ल्याइएको छ । उनीहरूविरुद्ध लागुऔषध सम्बन्धी कसूरमा मुद्दा दर्ता गरी पर्सा जिल्ला अदालतबाट ८ दिनको म्याद थप अनुमति लिएर थप अनुसन्धान भइरहेकोजिल्ला प्रहरी कार्यालय पर्साका प्रवक्ता प्रहरी नायब उपरीक्षक हरि बहादुर बस्नेतले जानकारी दिए ।
