वीरगंज । पर्साको पकहा मैनपुर गाउँपालिका–३ स्थित श्री राम चरित्र भगत माध्यमिक विद्यालयमा गाउँपालिकाका शिक्षा शाखा प्रमुख सञ्जय प्रसाद चौहानले बिहिवार आकस्मिक (छड्के) अनुगमन गर्नुभएको छ।
अनुगमनका क्रममा उहाँले विद्यालयको पठन–पाठन, विद्यार्थीको उपस्थिती र शिक्षकको अनुशासन सम्बन्धी विवरण बुझ्दै विद्यालय सुधारका लागि ठोस कदम चालिने बताउनुभयो। उहाँले शिक्षक र विद्यार्थी दुवैले विद्यालयको अनुशासनको पूर्ण पालना गर्नुपर्नेमा जोड दिनुभयो।
विद्यालयमा विद्यार्थीहरूले मोबाइल फोन ल्याउने र त्यसको दुरुपयोग गर्ने गुनासो प्राप्त भएपछि शिक्षा शाखा प्रमुख चौहानले विद्यालयका प्रधानाध्यापक मनोज यादवलाई मोबाइल प्रयोगमा नियन्त्रण गर्न निर्देशन दिनुभयो। त्यसअनुसार प्रधानाध्यापक यादवले विद्यालय परिसरमा विद्यार्थीको मोबाइल फेला परे जफत गरिने चेतावनी दिएका छन्।
शिक्षा शाखा प्रमुख चौहानले विद्यालयको शिक्षण गुणस्तर सुधार, उपस्थितिमा कडाइ र सिकाइ परिणाम उन्नयनका लागि निरन्तर अनुगमन जारी रहने जानकारी दिनुभयो।
