वीरगंज । जिल्ला प्रहरी कार्यालय पर्साले लागुऔषध गाँजा सहित एक जना व्यक्तिलाई पक्राउ गरेको छ।
प्रहरीका अनुसार वीरगंज महानगरपालिका–३२ चोर्नी बस्ने ७१ वर्षीय खेदु महतो धानुकलाई प्रहरीले सोमबार दिउँसो पक्राउ गरेको हो। विशेष सूचनाका आधारमा जिल्ला प्रहरी कार्यालय पर्सा तथा वडा प्रहरी कार्यालय श्रीपुरबाट खटिएको टोलीले धानुकको किराना पसलमा छापा मार्दा पसल पछाडि पट्टि रहेको कोठामा निलो प्लास्टिकको ड्रमभित्र लुकाइ राखिएको करिब ८ किलो गाँजा फेला पारेको थियो।
लागुऔषध सम्बन्धी कसूरमा पक्राउ परेका धानुकलाई आवश्यक कानूनी प्रक्रिया पूरा गरी थप अनुसन्धानका लागि पर्सा जिल्ला अदालतबाट पाँच दिनको म्याद अनुमति लिइएको जिल्ला प्रहरी कार्यालय पर्साले जनाएको छ।
प्रहरी नायब उपरीक्षक तथा कार्यालयका प्रवक्ता हरि बहादुर बस्नेतका अनुसार पक्राउ परेका धानुकमाथि लागुऔषधको कारोबारमा संलग्नता रहे–नरहेको विषयमा थप अनुसन्धान जारी रहेको छ।
