वीरगंज । नेशनल मेडिकल कलेज प्रा.लि. र विश्रामपुर गाउँपालिकाबीच मंगलबार एक महत्वपूर्ण स्वास्थ्य सेवा सम्बन्धी आपसी सम्झौता सम्पन्न भएको छ । वीरगंज–१५, भेडियाहीस्थित नेशनल मेडिकल कलेजको कार्यालयमा आयोजित कार्यक्रममा दुवै पक्षका प्रतिनिधिहरूको उपस्थितिमा सम्झौतापत्रमा हस्ताक्षर गरिएको हो।
सम्झौताअनुसार, विश्रामपुर गाउँपालिकाका पाँच वटै वडाका बासिन्दाहरूलाई नेशनल मेडिकल कलेज तथा शिक्षण अस्पतालमार्फत विशेष छुट र सुविधा सहितका स्वास्थ्य सेवा प्रदान गरिनेछ।
विश्रामपुर गाउँपालिकाको तर्फबाट गाउँपालिका अध्यक्ष जुल्फकार अली भुटो, प्रमुख प्रशासकीय अधिकृत सुनिल प्रसाद केसरी र स्वास्थ्य शाखा प्रमुख अली अकबर हुसेनको रोहबरमा सम्झौता सम्पन्न भएको हो । नेशनल मेडिकल कलेज तथा शिक्षण अस्पताल तर्फबाट प्रबन्ध निर्देशक शाहनवाज अन्सारीले सम्झौतापत्रमा हस्ताक्षर गर्नुभएको थियो।
समारोहमा कलेजका इन्जिनियर प्रदीप चौधरी, प्रशासन अधिकृत विश्वनाथ कान्त, प्रशासन अधिकृत पप्पु सिंह र प्रेस सल्लाहकार आशिक अन्सारी उपस्थित थिए।
त्यसैगरी, विश्रामपुर गाउँपालिकाको तर्फबाट वडा नं. २ का वडा अध्यक्ष मनोज यादव, कार्यपालिका सदस्य राजेन्द्र पाल, विद्यालय व्यवस्थापन समिति अध्यक्ष कृष्ण प्र. साह, न्यायिक समिति सदस्य मंजुर र आलम, गाउँ प्रहरी मुकतार आलम र सञ्चारकर्मी जोतिलाल पण्डितको समेत उपस्थिति रहेको थियो।
यस सम्झौताले अस्पताल र गाउँपालिका बीचको सहकार्यलाई नयाँ उचाइमा पुर्याउने विश्वास लिइएको छ। स्वास्थ्य सुरक्षालाई प्राथमिकतामा राख्दै गरिएको यो सहकार्य संस्थागत सामाजिक उत्तरदायित्व, पारदर्शिता र दीर्घकालीन साझेदारी सुदृढ पार्ने अपेक्षा गरिएको छ।
