वीरगंज । मधेस प्रदेशमा गरिएको नयाँ मुख्यमन्त्री नियुक्ति प्रक्रियाप्रति पाँच राजनीतिक दलका जिल्ला नेताहरूले संयुक्त रूपमा गम्भीर आपत्ति जनाएका छन्।
जनता समाजवादी पार्टी (जसपा), जनमत पार्टी, लोकतान्त्रिक समाजवादी पार्टी (लोसपा), नेकपा एकीकृत समाजवादी र राष्ट्रिय मुक्ति पार्टी नेपाल पर्साका नेताहरूले संयुक्त रूपमा प्रेस विज्ञप्ति जारी गर्दै प्रदेश प्रमुखको कदमलाई असंवैधानिक, अलोकतान्त्रिक र लोकतान्त्रिक मूल्य–मान्यताविपरीत भएको भन्दै घोर भत्सर्ना गरेका छन्।
विज्ञप्तिमा भनिएको छ, “प्रदेश प्रमुखले संविधान विपरीत झुठ, फरेब र धोकाधडीको सहारा लिई मुख्यमन्त्री नियुक्ति गरेको कार्य सभ्य समाजका लागि लज्जाको विषय हो। संविधानको धारा १६८(२) बमोजिम सरकार बनाउने स्पष्ट आधार हुँदाहुँदै बदनियतपूर्ण रूपमा गरिएको यो निर्णय पूर्ण रूपमा असंवैधानिक र अलोकतान्त्रिक छ।”
संयुक्त विज्ञप्तिमा थप भनिएको छ, “उपचार गराउने नाममा भाग्नु र कटेजमा सपथ खुवाउने कार्यले संघीयता, लोकतन्त्र र संविधानको घोर अपमान गरेको छ। यसर्थ सबै समस्याको समाधान संवैधानिक र लोकतान्त्रिक प्रक्रियाबाटै खोजिनुपर्छ।”
दलहरूले संविधान, लोकतन्त्र र संघीयतामाथि प्रहार गर्ने शक्ति विरुद्ध न्यायप्रेमी जनतालाई एकजुट हुन पनि आह्वान गरेका छन्।
संयुक्त विज्ञप्तिमा जसपा पर्साका अध्यक्ष रामनरेश यादव, जनमत पार्टी पर्साका अध्यक्ष ओमप्रकाश सर्राफ, लोसपा नेपाल पर्साका अध्यक्ष रामचन्द्र पण्डित, नेकपा (एकीकृत समाजवादी) पर्साका जिल्ला इन्चार्ज मनोज चौधरी र राष्ट्रिय मुक्ति पार्टी नेपाल पर्साका अध्यक्ष राजेश कुमार साहका हस्ताक्षर रहेका छन्।
