वीरगंज । जिल्ला प्रहरी कार्यालय पर्साले पछिल्ला दिनमा सामाजिक सञ्जालमार्फत विभिन्न प्रतिष्ठित व्यापारिक संस्थाहरूका नक्कली बिल–विजक बनाई ठगी गर्ने घटनाहरू बढ्दै गएको जनाएको छ।
प्रहरीका अनुसार ठगी समूहहरूले नक्कली बिल–विजकमार्फत सिमेन्ट, छड, मदिरा, मोटर पार्ट्स लगायतका सामग्री ठुलो मात्रामा खरिद गरी व्यापारिक समूहहरूलाई ठग्ने कार्य गर्दै आएका छन्।
यस घटनाको अनुसन्धान भइरहेका बेला प्रहरीले व्यापारी तथा उद्योगीहरूलाई कुनै पनि कारोवार गर्दा पूर्ण रूपमा एकिन भएपछि मात्र गर्न आग्रह गरेको छ । साथै, आधिकारिक अनुमति विनाका सामानहरू खरिद नगर्न पनि जिल्ला प्रहरी कार्यालय पर्साले अनुरोध गरेको छ ।
प्रहरीले यस्ता ठगीमा संलग्न व्यक्तिहरूलाई प्रचलित कानुन अनुसार कडा कारबाही गरिने चेतावनी दिँदै सबैलाई सचेत रहन अपील गरेको जिल्ला प्रहरी कार्यालय पर्साका प्रवक्ता प्रहरी नायब उपरीक्षक हरि बहादुर बस्नेतले जानकारी दिए ।
