पर्सा । सशस्त्र प्रहरी बल, नेपाल प्रस्तावित सीमा सुरक्षा गुल्म लहावरथकरीको आयोजनामा आउँदो शनिबार महिला साइकल रेस र पुरुष म्याराथन प्रतियोगिता सञ्चालन हुने भएको छ ।
शशस्त्र प्रहरी र स्थानीय समुदायबीच सौहार्दपूर्ण सम्बन्ध कायम गर्न र सीमाक्षेत्रमा सामुदायिक सहकार्य बढाउने उद्देश्यले हरेक महिनामा यस्ता कार्यक्रम सञ्चालन गर्ने निर्णय गरिएको छ । यो निर्णय बिहिबार बसेको सीमा सुरक्षा समितिको बैठकले गरेको हो ।
बैठकमा पकहामैनपुर गाउँपालिका–४ का वडाध्यक्ष तथा सीमा सुरक्षा समितिका संयोजक ढेडी यादवको अध्यक्षतामा छलफल भएको थियो । कार्यक्रममा सशस्त्र प्रहरी बल प्रस्तावित सीमा सुरक्षा गुल्म लहावरथकरीका डिएसपी लोकनाथ उप्रेतीले प्रत्येक महिनामा स्थानीय सहभागिता हुने यस्ता मैत्रीपूर्ण कार्यक्रम सञ्चालन गरेर सीमाक्षेत्रमा आपसी विश्वास र सहकार्य सुदृढ बनाइने बताए ।
प्रतियोगितामा सशस्त्र प्रहरी लहावरथकरी मातहतका कालिकामाई, पकहाँ मैनपुर र छिपहरमाई गाउँपालिकाअन्तर्गतका ४ वटा माध्यमिक विद्यालयका विद्यार्थीहरू सहभागी हुनेछन् । सहभागी विद्यालयहरूमा —कालिकामाई गाउँपालिका–२ को श्री स्काई साह माध्यमिक विद्यालय, भेडिहारी, श्री दिव्य कन्या माध्यमिक विद्यालय, बिरञ्जीवर्वा, पकहाँ मैनपुर गाउँपालिकाको श्री रामचरित्र भगत माध्यमिक विद्यालय, पकहामैनपुर, र छिपहरमाई गाउँपालिकाको श्री ब्रह्मस्थान नेपाल राष्ट्रिय प्राथमिक विद्यालय रहेका छन् ।
यी विद्यालयका ९ जना छात्राहरू साइक्ल प्रतियोगितामा र १५ जना छात्रहरू म्याराथन प्रतियोगितामा प्रतिस्पर्धा गर्नेछन् । प्रतियोगिता शनिबार बिहान ७ बजे श्री ब्रह्मस्थान नेपाल राष्ट्रिय प्राथमिक विद्यालयको प्राङ्गणमा सुरु हुने बताइएको छ ।
बैठकमा शशस्त्र प्रहरीका अधिकारीहरू, जनप्रतिनिधि, शिक्षक, पत्रकार, समाजसेवी, जेष्ठ नागरिक तथा स्थानीय अगुवाहरूको सहभागिता रहेको थियो ।
