वीरगंज । नारायणी अस्पताल वीरगंजमा वरिष्ठ चिकित्सकहरू हुँदा–हुँदै पनि जुनियर चिकित्सकलाई पुनः निमित्त मेडिकल सुपरिटेन्डेन्ट (मेसु) को जिम्मेवारी दिइएको छ ।
अस्पतालमा कार्यरत ११औँ तहका चार जना वरिष्ठ चिकित्सकहरूको उपस्थितिमा १०औँ तहका युरो सर्जन डा. चितरन्जन साहलाई निमित्त मेसुको जिम्मेवारी दिइएको हो ।
अस्पतालका तत्कालीन मेसु डा. चुमनलाल दासको स्वास्थ्य तथा जनसंख्या मन्त्रालयमा सरुवा भएपछि डा. साहले पुनः सो जिम्मेवारी सम्हालेका हुन् । मन्त्रालयका प्रवक्ता डा. समिर बुढाथोकीका अनुसार डा. साहलाई अनुभवका कारण तत्कालका लागि निमित्त मेसुको जिम्मेवारी दिइएको हो ।
“डा. साहले यसअघि पनि अस्पतालको नेतृत्व सम्हालिसकेका छन्, त्यसैले तत्कालका लागि उनीमाथि जिम्मेवारी दिइएको हो,” प्रवक्ता बुढाथोकीले जानकारी दिए ।
अस्पतालमा ११औँ तहका स्त्री तथा प्रसूति रोग विशेषज्ञ डा. सुरेन्द्र चौधरी, बालरोग विशेषज्ञ डा. शैलेश ठाकुर, यौन, छाला तथा कस्मेटिक रोग विशेषज्ञ डा. अतुलेश चौरसिया, र एनेस्थेसिया विशेषज्ञ डा. रामपुकार साह कार्यरत छन् । वरिष्ठ चिकित्सकहरू हुँदाहुँदै पनि पटक–पटक जुनियरलाई जिम्मेवारी दिइँदा कर्मचारीहरूबीच असन्तोष देखिएको स्रोतले जनाएको छ ।
आर्थिक तथा प्रशासनिक लेनदेनमा सहज पहुँच कायम राख्न केही समूहको स्वार्थअनुसार निर्णय गरिएको आरोप समेत कर्मचारी स्रोतले लगाएको छ ।
डा. चितरन्जन साहले यसअघि पनि दुई पटक निमित्त मेसुको जिम्मेवारी सम्हालेका थिए । पहिलो पटक २०७३ भदौ २९ देखि २०७४ असोज २८ सम्म, दोस्रो पटक २०७९ पुस ६ देखि २०८१ जेठ १३ सम्म र अहिले तेस्रोपटक कात्तिक १८ गतेदेखि उनले पुनः सो जिम्मेवारी सम्हालेका हुन् ।
अस्पतालभित्रको नेतृत्व व्यवस्थापनमा पटक–पटक हुने विवाद र असन्तुष्टिले संस्थागत कामकारबाहीमा असर पर्ने गरेको सरोकारवालाहरूको टिप्पणी छ ।
