वीरगंज । पर्सामा मतदाता नामावलीमा नाम दर्ता गराउनेहरूकाे उत्साहजनक सहभागिता देखिएको छ । जिल्ला निर्वाचन कार्यालय, वीरगंजमा दैनिक औसत ३ सय ५० देखि ४ सय जनासम्मले नाम दर्ता गराइरहेका छन् ।
निर्वाचन आयोगले जेन-जी समूहलाई लक्षित गर्दै असोज १० गतेदेखि अध्यादेशमार्फत मतदाता नामावली सङ्कलन सुरु गरेपछि युवाहरूको सहभागिता उल्लेखनीय रूपमा बढेको कार्यालयले जनाएको छ ।
कार्यालयका सूचना अधिकारी अरुण कुमार ठाकुरका अनुसार असोज १० गतेदेखि कात्तिक २० गतेसम्म कुल ४ हजार ७ सय ३३ जनाले नाम दर्ता गराएका छन् । जसमा १ हजार ८ सय ४५ महिला र २ हजार ८ सय ८८ पुरुष रहेका छन् । ठाकुरका अनुसार जेन-जी आन्दोलनपछि युवाहरूमा मतदाता नामावली दर्ताप्रति ठूलो उत्साह देखिएको छ ।
जिल्ला निर्वाचन कार्यालयकी प्रमुख अनामिका रौनियारले आयोगको निर्देशनअनुसार मतदाता नामावली सङ्कलन, नयाँ दल दर्ताको सनाखत र निर्वाचन सामग्री व्यवस्थापन कार्य एकसाथ भइरहेको बताइन् । उनका अनुसार “फागुन २१ गते निर्वाचन घोषणा भएपछि आयोगका निर्देशनका आधारमा जिल्ला स्तरबाट तयारीका काम भइरहेका छन् । कात्तिक ३० गतेसम्म नामावली सङ्कलन, दल सनाखत र सामग्री व्यवस्थापन जारी रहनेछ,” उनले भनिन् ।
उनका अनुसार आगामी निर्वाचनका लागि मतपेटिका र जनशक्तिको अवस्था आयोगलाई विवरणसहित पठाइएको छ भने सुरक्षा व्यवस्थाबारे छलफल हुन बाँकी रहेको छ ।
नाम दर्ता गराउन वीरगंज–३२ चोर्नीकी पुजा यादवले पहिलो पटक मतदान गर्ने अवसर पाउँदा खुशी लागेको बताइन् । “अब म आफैले मन पराएको उम्मेदवारलाई मतदान गर्न पाउने भएकी छु,” उनले भनिन् ।
जगरनाथपुर गाउँपालिका–३ का युवा लक्ष्मण लाल कानु पनि नाम दर्ता गराएर उत्साहित बनेका छन् । उनले उमेर पुगेका सबै युवाहरूलाई मतदाता नामावलीमा नाम दर्ता गर्न आग्रह गरे ।
जिल्ला निर्वाचन कार्यालयका अनुसार असार मसान्तसम्म पर्सामा कुल ३ लाख ५७ हजार २३८ मतदाता थिए । जसमा २ लाख १ हजार ७६५ पुरुष, १ लाख ५५ हजार ४५८ महिला र १५ अन्य छन् । निधन भएकाहरूको नाम हटाउने कार्य पनि निरन्तर भइरहेको कार्यालयले जनाएको छ ।
