वीरगंज । लिटिल बडी प्रि-स्कुल, वीरगंजले आफ्ना टोडलर र नर्सरी शिक्षकहरूका लागि “बालबालिकाको व्यवहार र सिकाइ प्रक्रिया बुझ्न सहयोग पुर्याउने” उद्देश्यसहित बाल मनोविज्ञान सम्बन्धी तालिम आयोजना गरेको छ।
तालिमकी प्रशिक्षक सुश्री पूजा सङगौला मरासिनीले प्रत्येक बालबालिकाको सिकाइ शैली फरक हुने बताउँदै शिक्षकहरूलाई माया, धैर्यता र बुझाइका साथ सिकाइ वातावरण सिर्जना गर्न आग्रह गरिन् । उनले कक्षाकोठामा सकारात्मक व्यवहार र सिकाइ सुदृढ गर्नका लागि विभिन्न व्यावहारिक विधिहरू पनि साझा गरिन्।
लिटिल बडी प्रि-स्कुलका प्रिन्सिपल विजय कुमार बलले प्रशिक्षक मरासिनीप्रति आभार व्यक्त गर्दै भने, “उहाँको प्रशिक्षणले हाम्रा शिक्षकहरूलाई बालबालिकाको दृष्टिकोणबाट सिकाइ बुझ्न र व्यवहार सुधार गर्न मद्दत पुर्याएको छ।”
कार्यक्रमको अन्त्यमा प्रशिक्षकलाई सम्मानपत्र प्रदान गरिएको थियो । शिक्षकहरूले तालिमबाट प्राप्त ज्ञानलाई दैनिक शिक्षण अभ्यासमा लागू गर्ने प्रतिबद्धता जनाएका थिए ।
यसैगरी, विद्यालयले शुक्रबार आफ्ना बालबालिकाले जम्मा गरेको बचत रकम पनि सार्वजनिक गरेको थियो । बालबालिकामा सानै उमेरदेखि नै रकम बचत गर्ने बानी विकास गर्न तीन महिना अघि विद्यालयले पी.जि., नर्सरी, एल.के.जी. र यु.के.जी.का विद्यार्थीहरूलाई खुत्रुके वितरण गरेको थियो।
कार्यक्रममा ती खुत्रुके फुटाइएपछि जम्मा भएको रकम ५ सयदेखि ९६ हजार ४५० रुपैया सम्म पुगेको विद्यालयले जनाएको छ । सबैभन्दा बढी बचत गर्ने बालबालिकाका अभिभावकलाई प्रमाणपत्र प्रदान गरिएको थियो भने विद्यालयले अतिरिक्त एक हजार रुपैया थपेर अभिभावकलाई रकम हस्तान्तरण गरेको थियो ।
