वीरगंज । छठ पर्वको शुभ अवसरमा वीरगंज कपडा बैंकले वीरगंजको घण्टाघरमा करिब ११ सय थान नि:शुल्क कपडा वितरण गरेको छ । गरीब र असहायहरूलाई लक्षित गरी सञ्चालन गरिएको यो वितरण कार्यक्रममा स्थानीय दातृ, समाजसेवी र समुदायका प्रतिनिधिहरूको सहभागिता रहेको थियो ।
वीरगंज कपडा बैंकले प्रत्येक वर्षका चाडपर्वमा झैँ यस वर्ष पनि आइतबारदेखि शुक्रबारसम्म बिहान १०:३० देखि बेलुका ५ बजेसम्म आफ्नै वीरगंज–८ स्थित कार्यालयबाट पनि गरीब तथा असहाय व्यक्तिहरूलाई नि:शुल्क कपडा वितरण गर्दै आएको जनाएको छ ।
कार्यक्रमका प्रमुख अतिथि समाजसेवी अधिवक्ता सुरेन्द्र प्रसाद कुर्मिले मानवतामुखी सेवामा सबैले आफ्नो आम्दानीको पाँच प्रतिशत रकम असहायहरूको सहयोगमा खर्च गर्नुपर्नेमा जोड दिए । उनले भने, “मानवको सेवा नै सर्वोत्तम धर्म हो । छठ पर्वले आपसी एकता र भाइचारालाई बलियो बनाउने सन्देश दिन्छ, त्यसैले विपन्न छठ व्रतालुहरूलाई सहयोग गर्नु नै सच्चा पूजा हो।”
कार्यक्रम वीरगंज कपडा बैंकका अध्यक्ष लालबाबू सिंहको अध्यक्षतामा सम्पन्न भएको थियो । कार्यक्रममा बैंकका वरिष्ठ सल्लाहकार अधिवक्ता पन्नलाल गुप्ता, सल्लाहकारहरु ओमप्रकाश सराफ, श्रवण बहादुर रायमाझी, समाजसेवीहरु गौरी गुप्ता, युवा हुकुम सिंह राजपुत, सतिष सिंह राजपुत, आइज नेपाल पर्साका कोषाध्यक्ष रुपशिला जैसवाल, महादेव कुर्मी, घण्टाघर प्रहरी पोष्टका प्रमुख असई राम बिनोद झा, बैंकका निवर्तमान अध्यक्ष रम्भा मिश्रा, उपाध्यक्ष मोनिका सिंह, सदस्यहरु हरेन्द्र पटेल, निला कुमारी राम, केदार गुप्ता, राजेश श्रीवास्तव, राहुल सिंह राजपुत लगायतको उपस्थिति रहेको थियो।
कार्यक्रममा अध्यक्ष सिंहले मानवसेवामा हातेमालो गर्दै कपडा बैंकलाई साथ दिने सम्पूर्ण दाता, शुभेच्छुक, सञ्चारकर्मी, सल्लाहकार तथा पदाधिकारीहरूलाई धन्यवाद दिँदै छठ पर्वको हार्दिक शुभकामना व्यक्त गरे।
