वीरगंज । वीरगंज महानगरपालिका–१ बजार छपकैयामा दिपावलीका अवसरमा झालरबत्ती जडान गर्ने क्रममा करेन्ट लागेर एक किशोरको मृत्यु भएको छ ।
मृत्यु हुनेमा स्थानीय लालु साह तेलीका १७ वर्षीय छोरा पीयूष साह रहेकाे वडा प्रहरी कार्यालय वीर्ताका प्रहरी निरीक्षक निरोज चौलागाईंले जानकारी दिनुभयो ।
धनतेरसको दिन शनिबार साँझ करिब ६ बजेतिर आफ्नै एकतले घरमा दिपावलीका लागि झालरबत्ती जडान गर्ने क्रममा पीयूषलाई बिजुलीको करेन्ट लागेको थियो । करेन्ट लागेपछि उनी अचेत भई लडेका थिए ।
स्थानीयवासीले तत्काल उनलाई उपचारका लागि नारायणी अस्पताल लगेका थिए, तर त्यहाँ उपचार सम्भव नभएपछि नेशनल मेडिकल कलेज लैजाने क्रममा बाटोमै उनको मृत्यु भएको प्रहरी निरीक्षक चौलागाईंले बताउनुभयो ।
दिपावली नजिकिँदै गर्दा झालरबत्ती तथा बिजुली उपकरण प्रयोग गर्दा सावधानी अपनाउन प्रहरीले सर्वसाधारणलाई आग्रह गरेको छ ।
