वीरगंज । ७०औं नेपाल प्रहरी दिवसका अवसरमा नेपाल प्रहरी प्रधान कार्यालय, काठमाडौँद्वारा आयोजित विशेष समारोहमा प्रहरी निरीक्षक बिक्रम साहलाई सम्मान प्रदान गरिएको छ।
अमर प्रहरीका सन्तानहरूको शैक्षिक सशक्तीकरण तथा अपाङ्ग र अशक्त प्रहरी कर्मचारीहरूलाई सहयोग पुर्याउने कार्यमा उल्लेखनीय योगदानका लागि उनलाई सम्मानित गरिएको हो।
प्रहरी महानिरीक्षक (आईजीपी) चन्द्रकुवेर खापुङले प्रहरी दिवस समारोहका बीच निरीक्षक साहलाई प्रशंसा पत्रसहित सम्मान प्रदान गरे।
पर्सा जिल्लाको वीरगञ्ज महानगरपालिका–१४ निवासी साहले प्रहरी सेवासँगै सामाजिक उत्तरदायित्व र मानवीय सेवाका क्षेत्रमा पनि सक्रिय भूमिका निभाउँदै आएका छन्। विशेषगरी अमर प्रहरीका आश्रित परिवार, सेवा निवृत्त र अशक्त प्रहरीजनलाई सहयोग पुर्याउँदै उनले संगठनको सामाजिक समावेशिता र सेवामूलक भूमिका सशक्त बनाउन योगदान दिएका छन्।
नेपाल प्रहरी प्रधान कार्यालयका अनुसार साहको योगदानले प्रहरी संगठनभित्र सकारात्मक ऊर्जा सञ्चार गर्नुका साथै समाजमा प्रहरीप्रतिको विश्वास र सम्मान अझ गहिरो बनेको छ।
प्रहरी निरीक्षक साहको यो सम्मानलाई वीरगञ्ज र पर्सा जिल्लावासीहरूले गर्वका रूपमा लिएका छन्। प्रहरी सेवासँगै मानव सेवामा समेत उनको समर्पण भावी पुस्ताका लागि प्रेरणादायी उदाहरण बन्ने विश्वास गरिएको छ।
