वीरगंज । वीरगंज महानगरपालिका–१६ बसपार्कस्थित पर्सा मदिरा व्यवसायी संघको कार्यालय एक विशेष समारोहका बीच उद्घाटन गरिएको छ।
कार्यक्रमका प्रमुख अतिथि वीरगंज साइक्लिङ क्लबका अध्यक्ष सञ्जय अग्रवालले रिबन काटी कार्यालयको उद्घाटन गरे । उद्घाटन समारोहमा बोल्दै उनले जिल्लाको मदिरा व्यवसायलाई व्यवस्थित, पारदर्शी र जिम्मेवार बनाउन संघले महत्वपूर्ण योगदान पुर्याउने विश्वास व्यक्त गरे ।
सो अवसरमा पर्सा मदिरा व्यवसायी संघको सञ्चालक समिति पनि औपचारिक रूपमा घोषणा गरिएको छ । समितिकाे अध्यक्षमा चिनीलाल पटेल, उपाध्यक्षमा सन्दीप कुमार गुप्ता, महासचिवमा प्रदीप कुमार लोहार, सचिवमा रजनीश कुमार, कोषाध्यक्षमा राकेश कुमार साह रहेका छन् । त्यस्तै सदस्यहरूमा मनीष प्रसाद कलवार, अनिल कुमार चापागाई, राम कुमार यादव र रजित जयसवाल रहेका छन् भने प्रेस सल्लाहकारमा सन्तोष पटेल चयन भएका छन् ।
संघका अध्यक्ष चिनीलाल पटेलले संघको मुख्य उद्देश्य जिल्लाभित्रका मदिरा व्यवसायीहरूलाई एकजुट गर्दै व्यवसायमा पारदर्शिता र अनुशासन ल्याउनु रहेको बताए। उपाध्यक्ष सन्दीप गुप्ताले संघले व्यापारसँगै सामाजिक उत्तरदायित्वका क्षेत्रमा पनि सक्रिय भूमिका निर्वाह गर्ने बताए।
कार्यक्रममा विभिन्न व्यवसायी, समाजसेवी र स्थानीय प्रतिनिधिहरूको उल्लेखनीय उपस्थिति रहेको थियो ।
अन्त्यमा महासचिव प्रदीप कुमार लोहारले सबै अतिथी र सहभागीहरूलाई धन्यवाद ज्ञापन गर्दै कार्यक्रम समापन गरेका थिए।
