सेढवा । दशैं सकिएसँगै तिहार नजिकिँदै जाँदा पर्साका ग्रामीण क्षेत्रका बासिन्दाहरू अहिले घरको लिपपोत, सरसफाइ र कातिकी खेतीका तयारीमा व्यस्त भएका छन् । वर्षायाममा घरका भित्तो, छाना र आँगनमा झारपात उम्री फोहोर बढेपछि अहिले सर्वसाधारणले घर–आँगन सफा गर्दै तिहारको तयारी थालेका हुन्।
लक्ष्मी पूजाको अवसरमा घर आँगनलाई सुन्दर बनाउनका लागि बिहानैदेखि ग्रामीण गृहेणीहरू भाँचिएका खरका भित्ताहरू मर्मत गरी पहेंलो चिम्टियाइलो माटोले लिपपोत गर्न जुटेका छन्। जिराभवानी गाउँपालिका–२ सेढवाकी कान्ती देवीका अनुसार, “यो वर्ष पानी ढिलो रोकिएकाले घर–आँगन सफा गर्न ढिलो भयो, त्यसैले अहिले हतार–हतारमा तिहारको तयारी गर्दैछौं।”
साथै, घरका भित्तासँगै झ्याल–ढोकामा रंगरोगन र रंगिन बतिहरूको जडान पनि सुरु भएको छ। गाउँका घरहरू झिलिमिली बनाउन विभिन्न प्रकारका रंगीन बल्ब र बत्तीहरू जडान गर्न थालेका स्थानीयहरूले बताएका छन्।
यसैबीच, धान भण्डारण र हिउँदे बाली रोपाइँका तयारीमा किसानहरू पनि व्यस्त छन्। खेतमा पाक्न लागेका धान काट्ने र भण्डारणका लागि बाँसको भाठाबाट बनेका भकारी मर्मत गर्ने काम भइरहेको छ। वर्षायाममा बिग्रिएका भकारी र फुसका छानाहरू मर्मत गरी प्रयोगमा ल्याउने क्रम तीव्र बनेको किसानहरूले जनाएका छन्।
जगरनाथपुर गाउँपालिका–३ का किसान रामचन्द्र यादवका अनुसार, “अहिले हामी तोरी, रायो, आलु, लसुन, चमसुर, धनिया, भण्टा, काउली, बन्दा लगायतका हिउँदे तरकारी रोप्ने तयारीमा छौं। खेतको सरसफाइ र जोताइको काम सकिँदैछ।”
तर, जिराभवानी र ठोरी गाउँपालिकामा तोरी खेतीमा समस्या देखिएको छ। खेतमा पानी जमेकाले तोरी छर्ने काम रोकिएको किसानहरूको भनाइ छ। उनीहरूले भने, “ढिलो गरी तोरी छरे बालामा दाना लाग्ने बेलामा जाडो पर्न सक्छ, जसले उत्पादन घटाउँछ।”
हाल यस क्षेत्रमा करिब छ सयदेखि आठ सय बिघासम्ममा तोरी खेती हुँदै आएको छ। किसानहरूले समयमै पानी निकास र जमिन तयारी हुन सके तोरी उत्पादनमा सुधार हुने विश्वास व्यक्त गरेका छन्।
