वीरगंज । चित्रांश यूथ टिम वीरगंजको आयोजनामा तथा चित्रगुप्त समिति वीरगंजको प्रस्तुतिमा “पहिलो कायस्थ सुपर सिक्स नॉकआउट प्रतियोगिता–२०८२” आयोजना हुने भएको छ।
बिहिबार वीरगंजमा आयोजित पत्रकार सम्मेलनमा कार्यक्रमका संयोजक प्रकाश कर्ण, मिहिर कर्ण, महेश दास र राजन श्रीवास्तवले प्रतियोगिता सम्बन्धी विस्तृत जानकारी दिएका हुन् । आयोजकका अनुसार प्रतियोगिता आगामी कार्तिक ७ गते बिहान ७ बजेदेखि वीरगंजको ज्ञानदा एकेडेमीको मैदानमा सुरु हुनेछ।
प्रतियोगिता सुपर सिक्स नॉकआउट प्रारूपमा खेलाइनेछ, जसअन्तर्गत १० टिम सहभागी हुनेछन् । प्रत्येक खेल ५ ओभरको हुनेछ र सम्पूर्ण प्रतियोगिता एकै दिनमा सम्पन्न गरिनेछ।
कार्यक्रममा वीरगंज महानगरपालिकाको सहयोग रहने आयोजकले जनाएका छन् । साथै, पत्रकार सम्मेलनपछि सहभागी टिमहरूका खेलाडीहरूको अक्सन (किनबेच प्रक्रिया) पनि सम्पन्न गरिने जानकारी दिइएको छ ।
आयोजक समितिका अनुसार यस प्रतियोगिताको उद्देश्य युवाबीच आपसी सहयोग, खेलप्रतिको रुचि र सामाजिक एकता अभिवृद्धि गर्नु रहेको छ।
