वीरगंज । राजस्व अनुसन्धान कार्यालय बारा, पथलैया स्थित कार्यालयले वीरगञ्ज महानगरपालिका–९, गीता मन्दिर रोड नजिकै रहेको सुनचाँदी व्यवसायी अभिषेक सर्राफको घरमा छापामारी गरेको छ।
राजस्व अनुसन्धान कार्यालयका प्रमुख अनुसन्धान अधिकृत हरिप्रसाद शर्माको नेतृत्वमा खटिएको टोलीले अभिषेक ज्वेलर्सका सञ्चालक सर्राफको घर, कारोबार स्थल र गोदाममा राजस्व चुहावटको सूचनाका आधारमा खानतलासी गरेको हो।
अधिकृत शर्माका अनुसार, छानबिनका क्रममा कारोबारसँग सम्बन्धित कागजात, खाता, विद्युतीय माध्यम र अन्य प्रमाणहरू कब्जामा लिइएका छन् । उनले भने, “राजस्व चुहावट भएको सूचनाको आधारमा यो खानतलासी गरिएको हो । राजस्व चुहावट (अनुसन्धान तथा नियन्त्रण) ऐन, २०५२ बमोजिम आवश्यक कागजात, मालसामान तथा प्रमाणहरू कब्जामा लिएर छानबिन भइरहेको छ।”
छापामारीका क्रममा संचालक सर्राफलाई नियन्त्रणमा लिएर सुनचाँदी व्यवसायी संघको रोहवरमा आवश्यक सोधपुछ र चेकजाँच भइरहेको जनाइएको छ।
घटनास्थलमा नेपाल प्रहरी र सशस्त्र प्रहरीको बाक्लो उपस्थिति रहेको थियाे । राजस्व अनुसन्धान कार्यालयको टोलीले कब्जामा लिएको सुनचाँदी तथा सम्बन्धित वस्तुहरूको विवरण संकलन कार्य भइरहेकाे वताएकाे छ ।
