वीरगंज । वीरगंज महानगरपालिका वडा नम्बर ३१ टोल बेलवामा रहेको एक चिरान मिल (स मिल)बाट पाँच थान सालको गोलिया बरामद भएकाे छ । सबडिभिजन वन कार्यालय सबैया र सशस्त्र बेस क्याम्प सोलकपुरको संयुक्त गस्ती टोलीले करिब १८ क्युफिट सालको गोलिया बरामद गरेको हो ।
सोही स मिलबाट दुईजनालाई पक्राउ गरिएको छ । पक्राउ पर्नेमा वीरगंज–३१ टोल प्रसाैनीका क्यामोदिन मिया हजाम र वीरगंज–२८ का जयलाल ठाकुर रहेका छन् । दुवैलाई अनुसन्धानका लागि जिल्ला वन कार्यालयमा राखिएको सबडिभिजन वन कार्यालयका रेन्जर भूपाल रोकायले जानकारी दिए ।
उनका अनुसार काठ ल्याउने स्रोत र साधनको खोजी भइरहेको छ । सशस्त्र बेस क्याम्प सोलकपुरका सई लोकबहादुर कार्कीले विशेष सूचनाका आधारमा गस्ती टोली पुगेको र सो टोली पुग्नुअघि पिकअप भ्यानबाट काठ झारिएको प्रारम्भिक जानकारी प्राप्त भएको बताए ।
स्थानीयका अनुसार संयुक्त टोली पुग्नुअघि काठ ना १३ प १०४८ नम्बरको पिकअप भ्यानबाट साे काठ झारिएकाे थियाे । उक्त भ्यान केही वर्षअघि अवैध सालको गोलिया ओसारपसारको आरोपमा पक्राउ परेपछि धरौटीमा छुटेको समेत स्थानीयहरूले बताएका छन् ।
सम्बन्धित निकायहरूले काठ ओसारपसारमा संलग्न व्यक्तिहरू र पिकअप भ्यानबारे थप अनुसन्धान गरिरहेको जनाएका छन् ।
