वीरगंज । जनमत युवा दस्ता पर्साद्वारा वीरगंजमा आयोजित कार्यक्रममा करिब ८० जना युवाहरू औपचारिक रूपमा जनमत पार्टीमा प्रवेश गरेका छन् । कार्यक्रममा वीरगंज ८ र १५ नम्बर वडामा बुथस्तरीय युवा दस्ता गठन गरिएको छ ।
जिल्ला युवा दस्ता अध्यक्ष मनोज साहको अध्यक्षतामा सम्पन्न कार्यक्रममा गुलाम हवारी, अमन गुप्ता, आकाश कुमार कानू, बिकी सर्राफ, सागर कुमार ठाकुर, रोशन पाण्डे, रोहन ठाकुर लगायत प्रभावशाली युवाहरूको नेतृत्वमा पार्टी प्रवेश गरेकाे जनमत पार्टी पर्साका अध्यक्ष ओमप्रकाश सर्राफले जानकारी दिए ।
नवप्रवेशीहरुलाई कार्यकारिणी सदस्य तथा जिल्ला इन्चार्ज माधव सिंह, जिल्ला अध्यक्ष सर्राफ र युवा जनमत संघका जिल्ला अध्यक्ष उदय यादवले गम्छा–टीका लगाई स्वागत गरेका थिए । कार्यक्रममा उपाध्यक्ष धिरेन्द्र पन्जियार, कोषाध्यक्ष सिकेन्द्र राम, हिरालाल राम लगायतको उपस्थिति रहेको थियो ।
कार्यक्रमलाई सम्बाेधन गर्दै जिल्ला अध्यक्ष सर्राफले जनमत पार्टीको “नौलो गणतन्त्र”को एजेन्डा नै जेन्जी पुस्ताको मुख्य चाहना भएको बताए । प्रत्यक्ष निर्वाचित कार्यकारी प्रमुख, दलिय सेन्डिकेटको अन्त्य, प्रतिस्पर्धामूलक संवैधानिक नियुक्ति र भ्रष्टाचार नियन्त्रण नै नौलो गणतन्त्रको आधार भएको उनले स्पष्ट पारे ।
उनले आम जनताको अवस्था परिवर्तन गर्न जनचेतनामा रूपान्तरण आवश्यक भएको उल्लेख गर्दै, निर्वाचन परिणाममा समेत बदलाव ल्याउनु जरुरी भएकोमा जोड दिए ।
