सेढवा । पर्साको जिराभवानी गाउँपालिका–४ सुपौलीका स्थानीय युवा तथा नागरिकहरू सार्वजनिक र निजी सम्पत्ति संरक्षणमा जुटेका छन्।
जेन–जी आन्दोलनको नाम दुरुपयोग गर्दै विभिन्न समूहले ग्रामीण भेगमा तोडफोड र आगजनीको घटना बढेपछि स्थानीयहरूले सुपौलीमा रहेका इलाका प्रशासन कार्यालय, स्वास्थ्य चौकी, वडा कार्यालय, विद्यालयलगायतका सार्वजनिक सम्पत्तिको सुरक्षा गर्न स्वयंसेवी रूपमा पहरा दिइरहेका छन्।
सुपौली बजारको चौकीमा तैनात स्थानीय युवाहरू लाठीसहित बिहानैदेखि पालैपालो सुरक्षामा खटिएका छन्। उनीहरूले सार्वजनिक सम्पत्ति बचाउन समुदायको सहकार्यमा सतर्कता बढाइएको बताए।
जेन–जी उमेर समूहका युवाहरूको आन्दोलनपछि अन्तरिम सरकार गठनबारे वार्ता भइरहेका बेला पर्साका विभिन्न स्थानमा जेन–जीको नाम दुरुपयोग गर्दै सरकारी कार्यालय र जनप्रतिनिधिहरूको घरमा आक्रमण गर्ने घटना बढेसँगै स्थानीयहरू सक्रिय बनेका हुन् ।
बुधबार जिराभवानी गाउँपालिकाकाे कार्यालयमा एक समुहले जेन जिकाे नाममा आगजनी गरेपछि त्यहाँका युवाहरु सर्तकता अपनाउन थालेका हुन् ।
