वीरगंज । खानेपानी मन्त्री प्रदीप यादवलाई फोनमार्फत धम्की दिएको आरोपमा पक्राउ परेकी किरण साहको मुद्दामा बहस सकिएको छ ।
मन्त्री यादवका स्वकिय सचिव हरिन्द्र साहकाे जाहेरी दरखास्तकाे आधारमा प्रहरीले कलैया उपमहानगरपालिका–२६, सिस्वा महेशपुर स्थायी घर भएकी हाल वीरगंज १३ मुर्ली बस्दै आएकी टिकटकर साहलाई गत शनिबार नियन्त्रणमा लिएर अनुसन्धान थालेकाे थियाे ।
जिल्ला प्रहरी कार्यालय पर्साले विधुतिय काराेबार सम्बन्धि कसुर लगायतकाे मुद्दाकाे फाइल सरकारी वकिल कार्यालयम बुझाएपछि आज जिल्ला अदालत पर्सामा थुनछेक बहस भएको हो । आवश्यक अनुसन्धान सम्पन्न भएपछि फाइल बुझाइएको जिल्ला प्रहरी कार्यालय पर्साका प्रवक्ता डिएसपी किशोर लम्सालले जानकारी दिए ।
सरकारी वकिलको कार्यालयले अभियोगपत्र दर्ता गरेपछि आज जिल्ला अदालतका न्यायाधीश कमलकान्त जोशीको इजलाश नं. ९ मा थुनछेक बहस सम्पन्न भएको अदालत स्रोतले जनाएको छ । स्रोतका अनुसार आजै अदालतबाट साहलाई धरौटीमा रिहा वा पुर्पक्षका लागि कारागार चलान गर्ने आदेश आउने सम्भावना छ।
प्रहरी हिरासतमा रहेकी साहसंगै राैतहटका पत्रकार अभिमन्नु पटेल भन्ने अभिमनु राउतमाथि पनि सरकारी वकिलकाे कार्यालयले विधुतिय काराेबार सम्बन्धि कसुरमा अभियाेग पत्र दर्ता गरेकाे छ । साहकाे तर्फबाट आज तिन जना अधिवक्ताहरुले बहस गरेका छन् ।
