वीरगंज । आरम्भ भेट्रान क्लब र पर्सेली पत्रकारबीच शनिबार भएको मैत्रीपूर्ण फुटबल प्रतियोगितामा पत्रकारको टोली पराजित भएको छ ।
नारायणी रंगशालामा आयोजित ३० मिनेटको खेलमा आरम्भ भेट्रान क्लबले पत्रकार टोलीलाई २–१ गोलअन्तरले हराएको हो । पहिलो हाफ गोलरहित बराबरीमा रोकिए पनि दोस्रो हाफको सुरुवातमै आरम्भ भेट्रान क्लबका खेलाडी मदन साहले पहिलो गोल गर्दै अग्रता दिलाए । त्यसपछि सुदीप शाहीले दोस्रो गोल थपे ।
खेलको अन्तिम समयमा पत्रकार टोलीका बिशेश्वर पटेलले एक गोल फर्काए पनि टोलीले जित हात पार्न सकेन ।
खेलमा पत्रकार टोलीको नेतृत्व नेपाल खेलकुद पत्रकार मञ्च पर्साका अध्यक्ष तिवारी यादवले गरेका थिए भने आरम्भ भेट्रान क्लबको नेतृत्व सचिव सन्तोष खडकाले गरेका थिए ।
