वीरगञ्ज । सशस्त्र प्रहरी बल, नेपाल नं. १३ गण हे.क्वा. पर्साबाट खटिएको संयुक्त टोलीले रु. १९ लाख २५ हजार ७३६ बराबरका अबैध सामान बरामद गरी वीरगञ्ज भन्सारमा बुझाएको छ ।
बुधबार खटिएको टोलीले वीरगञ्ज महानगरपालिका–१० अशोक बाटिका निवासी सिता थापाको घरमा भारतबाट भन्सार छली गरी ल्याएर भण्डारण गरिएको कपडा फेला पारेको हो । सोही स्थानमा बिआर २२ एस ०७१०१ नम्बरको भारतीय मोटरसाइकलमा लोड गरी नेपालतर्फ ल्याउँदै गरेको सामान समेत बरामद गरिएको सशस्त्र प्रहरीले जनाएको छ ।
बरामद गरिएका सामानमा Afzal Double Apple Flavour, विभिन्न कपडा र किराना सामग्री रहेका छन् जसको भन्सार मूल्य रु. १७ लाख ८५ हजार ७३६ रहेको छ । त्यस्तै, सामान ओसारपसारमा प्रयोग भएको मोटरसाइकलको मूल्य रु. १ लाख ४० हजार मुल्याङ्कन गरिएको छ ।
बरामद गरिएका सबै सामान तथा मोटरसाइकल आवश्यक कारबाहीका लागि वीरगञ्ज भन्सार कार्यालय पर्सामा बुझाइएको सशस्त्र प्रहरी बल नेपाल नं. १३ गण, पर्साका प्रहरी नायव उपरिक्षक तथा सूचना अधिकारी सुरज कार्कीले जानकारी दिए ।
