वीरगंज । पर्साका प्रमुख जिल्ला अधिकारी (सिडिओ) तोय नारायण सुवेदीले इमान्दारीपूर्वक जिल्लाको सुशासन कायम गर्न सक्दो प्रयास गर्ने प्रतिबद्धता व्यक्त गरेका छन् ।
मंगलबार जिल्लाका सञ्चारकर्मीहरूसँगको परिचयात्मक कार्यक्रममा बोल्दै उनले नागरिकको शान्ति–सुरक्षा सुनिश्चित गर्दै सरकारी कार्यालयमार्फत प्रवाह हुने सेवा–सुविधालाई व्यवस्थित बनाउने आफ्नो प्रमुख दायित्व हुने बताए ।
सुवेदीले जिल्लामा देखिएका समस्याहरूलाई पहिचान गरी योजनाबद्ध ढंगले समाधान गर्ने प्रतिवद्धता जनाउँदै हाल वीरगंजमा फैलिएको हैजा नियन्त्रणका लागि स्वास्थ्यकर्मीहरूसँग समन्वय गरी प्रभावकारी कदम चालिने स्पष्ट पारे । साथै, सिमावर्ती क्षेत्रमा हुने अवैध गतिविधि र अपराधजन्य कार्य रोकथाम गर्न निगरानी कडा पारिने बताए ।
उनले मलखादमा हुने कालोबजारी नियन्त्रण गर्न नियमित अनुगमन गरिने र किसानलाई सहज रूपमा मल उपलब्ध गराइने व्यवस्था मिलाइने उल्लेख गरे । सेवाग्राहीको बढी चाप हुने कार्यालयहरूमा आवश्यक व्यवस्थापन गरी छिटो र सहज सेवा प्रवाह गर्ने कार्य प्राथमिकतामा रहने उनको भनाइ थियो ।
सुवेदीले जिल्ला प्रशासन कार्यालयमा खासगरी राष्ट्रिय परिचयपत्र बनाउन लाग्ने भीड देखिएकाे वताउँदै त्यसलाई पनि व्यवस्थतित गरिने वताए । उनले भने “नागरिकले सहज रूपमा सेवा पाउनु पर्छ भन्ने मेरो प्राथमिकता हुनेछ,” त्यस अनुसार नै आफु इमान्दारिक पूर्वक काम गर्छु ।
जिल्ला प्रशासन कार्यालय पर्साकाे सभाहलमा भएकाे परिचात्यमक कार्यक्रममा सहायक प्रमुख जिल्ला अधिकारीद्वय सुमन कुमार कार्की, बाबुलाल रेग्मी पनि उपस्थिती रहेकाे थियाे ।
