सेढवा । वीरगंज तथा पर्साका विभिन्न स्थानमा देखिएको झाडापखाला तथा हैजाको प्रकोपलाई ध्यानमा राख्दै जिराभवानी गाउँपालिकाले पूर्वतयारी थालेको छ ।
गाउँपालिकाको विपद व्यवस्थापन समितिको मंगलबार बसेको बैठकले वडा नं ४ स्थित सुपौली स्वास्थ्य चौकीमा झाडापखाला तथा हैजा उपचार केन्द्र स्थापना गर्ने निर्णय गरेको छ । स्वास्थ्य शाखा प्रमुख अजय चौधरीका अनुसार उपचारका लागि आवश्यक औषधि, जनशक्ति तथा अन्य आधारभूत सुविधाको व्यवस्था मिलाउने काम अघि बढाइएको छ ।
यसै क्रममा पालिकाभर कार्यरत स्वास्थ्यकर्मीलाई अति आवश्यक कार्यबाहेक बिदा नदिने, स्वास्थ्य स्वयंसेविकालाई परिचालन गर्ने र आम नागरिकलाई रोगसम्बन्धी जनचेतनामूलक प्रचार–प्रसार गर्ने कार्य पनि सुरु गरिएको जनाइएको छ ।
बैठकमा गाउँपालिका अध्यक्ष अनोज चौधरी, प्रमुख प्रशासकीय अधिकृत राज कुशवाहा, वडाध्यक्ष रामशरण ख्वास, महादेव महतो थारु, स्वास्थ्यकर्मी, जनपद तथा शसस्त्र प्रहरी र सञ्चारकर्मीहरूको उपस्थिति थियो ।
