वीरगंज । सशस्त्र प्रहरीले वीरगंजमा हैजा रोकथामसहित विभिन्न सामाजिक विषयमा जनचेतनामूलक अभियान सञ्चालन गरेको छ ।
वीरगंज महानगरपालिकामा देखिएकाे हैजा राेकथामकाे लागि यहाँका समुदायलाई लक्षित गरी जनचेतामूलक अभियान सुरु गरिएको सशस्त्र प्रहरी बल १३ नम्बर गणका प्रमुख प्रहरी उपरिक्षक (एसपी) पुरणचन्द भट्टले जानकारी दिए । उनका अनुसार २४ वटा युनिटमार्फत वीरगंजका विभिन्न टाेल, बस्ती तथा समुदायमा पुगेर दैनिक ७२ वटा जनचेतनामूलक कार्यक्रम सञ्चालन भइरहेको छ ।
यस अभियानमार्फत नागरिकलाई हैजाबाट बच्ने उपायहरूका साथै शान्ति–सुरक्षा, सामाजिक अनुशासन, विपद् व्यवस्थापन, लागुऔषध नियन्त्रण, सीमापारि हुने गैरकानुनी गतिविधि रोकथाम, महिला तथा बालबालिकाको सुरक्षा लगायतका विषयमा समेत जानकारी दिइएको छ ।
