वीरगंज । सशस्त्र प्रहरी बल, पर्साले सीमामा अबैध भन्सार छली गर्ने काम रोक्दै करोडभन्दा बढी मूल्य बराबरका सामान भन्सार कार्यालय पर्सामा बुझाएको छ। शनिबार र आइतबार खटिएको विभिन्न टोलीले पर्सा जिल्लाभित्र अबैध रूपमा नेपालतर्फ ल्याइँदै गरेको चकलेट, किराना, कपडा, पशुचौपाय तथा विभिन्न सामानहरू सहित सवारी साधनहरु नियन्त्रणमा लिएको हो।
वीरगंज महानगरपालिका–११ पावरहाउस चोकबाट भारतबाट अबैध रूपमा ल्याइँदै गरेको रु. ७ लाख ४४ हजार मूल्य बराबरको चकलेट र सो कार्यमा प्रयोग भएको टेम्पो तथा ई-लोडर रु. १३ लाख मूल्य बराबरकाे नियन्त्रणमा लिइ भन्सार कार्यालय बुझाइएको थियो । त्यस्तै रु. ३६ हजार ४४० बराबरको किराना सामान र मो.सा. रु. १ लाख मूल्य बराबरकाे नियन्त्रणमा लिइ कारबाहीका लागि बुझाइएको सशस्त्र प्रहरीले जनाएकाे छ ।
आइतबार नै सशस्त्र प्रहरी बलको अर्को टोलीले वीरगंज–१९ विन्दवासिनी चौकबाट अबैध रूपमा नेपालतर्फ ल्याइँदै गरेको ३ लाख ७४ हजार २०५ मूल्य बराबरको कपडा, किराना सामान र माेटरसाइक एक लाख ५० हजार मूल्य बराबरको नियन्त्रणमा लिई भन्सारमा बुझाएको सशस्त्र प्रहरी बल १३ नम्बर गणका सूचना अधिकारी डिएसपी सुरज कार्कीले जानकारी दिए ।
उनका अनुसार सशस्त्र प्रहरी बल नेपाल नं.१३ गण, पर्साले सुवर्णपुर, भिखम्पुर, अमरपट्टी र पिडारीगुठि कार्यालयमार्फत रु. २ लाख ८३ हजार १२० बराबरको पशुचौपाय र विभिन्न सामानहरु भन्सारमा बुझाएको र लिलामी प्रक्रियामा रहेको जानकारी प्राप्त भएको छ । सूचना अधिकारी सुरज कार्कीका अनुसार, अवैध भन्सार नियन्त्रणका लागि निरन्तर कारबाही जारी रहने छ ।
