सेढवा । पर्साको सखुवाप्रसौनी गाउँपालिकामा नेपाल सरकारको अनुदानित रासायनिक मल वितरणलाई लिएर विवाद चुलिएको छ ।
वडा नं. २ मा रहेको कोडेक नेपाल कृषि सहकारी संस्थाले पत्रकार सम्मेलन गरेर गाउँपालिकाका उपाध्यक्ष तथा मल व्यवस्थापन समितिका संयोजक शर्मिला बिष्ट महतोमाथि अन्यायपूर्ण निर्णय गरेको आरोप लगाएको हो । संस्थाका सञ्चालक सत्यजीत चौधरीका अनुसार सावन १८ गते ल्याइएको २६० बोरा यूरिया र ६५ बोरा डीएपी मलमध्ये उपाध्यक्ष महतोका श्रीमान गौरीशंकर महतोले ४० बोरा यूरिया माग गरेको तर नदिएपछि सिफारिस नै खारिज गरिएको दाबी छ।
संस्थाले सावन २२ गते कृषि सामग्री कम्पनी लिमिटेड र साल्ट ट्रेडिङ कम्पनी लिमिटेडमा क्रमशः रु. ३ लाख ३० हजार र १ लाख ८२ हजार रकम जम्मा गरेको थियो। तर, सावन २३ गते गाउँपालिकाले अचानक सिफारिस खारेज गरेपछि मल ल्याउन र किसानलाई वितरण गर्न नसकिएको चौधरीले बताए।
उता, वडा नं. २ का किसान सन्देश साहले भने सहकारीले टोलवार आधारमा वितरण गर्ने गरेको र आफूले सावन १९ मा २५ किलो यूरिया पाएको जानकारी दिए।
यता संयोजक शर्मिला बिष्ट महतोले भने सहकारीले मृतक व्यक्तिको नाममा समेत मल दिएको र एउटै नागरिकताको आधारमा ४ बोरा वितरण गरेको प्रमाण पाइएको आरोप लगाइन्। सो कारण सिफारिस खारेज गरिएको र सहकारीमाथि छानबिन तथा कारबाही प्रक्रिया अघि बढाइएको उनले बताइन्।
सहकारी संस्थाको सिफारिस खारेज भएपछि किसान आक्रोशित बनेका छन् । प्राप्त जानकारीअनुसार पालिकाले क्रमशः वडा नं. ५ को किरण भूमि कृषि सहकारी, बेल माई कृषि सहकारी र वडा नं. ३ को कोपिला कृषि सहकारीलाई मल ल्याउने सिफारिस गरेको तर ती सबैको सिफारिस पनि फेरि खारेज गरिएको छ।
यसैबीच, केही दिन अघि जिल्ला प्रशासन कार्यालय पर्साले सखुवाप्रसौनीमै भण्डारण गरिएको १९१ बोरा रासायनिक मल बरामद गरेको थियो । अहिले गाउँपालिका अध्यक्ष यशवन्त यादव, उपाध्यक्ष महतो, प्रमुख प्रशासकीय अधिकृत, वडाध्यक्ष, कृषि शाखा र किसानबीच विवाद समाधानका लागि छलफल भइरहेको बुझिएकाे छ ।
