वीरगंज । पर्साको जगरनाथपुर र जीराभवानी गाउँपालिकाले वीरगंजस्थित नारायणी अस्पताललाई ६ थान वातानुकूलित एसी संयुक्त रूपमा प्रदान गरेका छन् । अस्पतालको मेडिकल वार्डमा उपचाररत बिरामीहरूलाई गर्मीका कारण भोग्नुपरेको असहजतालाई कम गर्न उद्देश्यले सो सहयोग उपलब्ध गराइएको हो ।
जगरनाथपुर गाउँपालिकाका अध्यक्ष श्रीकान्त प्रसाद यादव र जीराभवानी गाउँपालिकाका अध्यक्ष अनोज चौधरीले मंगलबार अस्पतालमै पुगेर एलजी कम्पनीका ६ थान एसी अस्पतालका मेडिकल सुपरिन्टेन्डेन्ट (मेसु) डा. चुमनलाल दासलाई हस्तान्तरण गरे । दुबै गाउँपालिकाले ३/३ थान एसी उपलब्ध गराएको अस्पताल विकास समितिका अध्यक्ष धिरजकुमार गुप्ताले जानकारी दिए ।
साे अवसरमा नारायणी अस्पतालका डा. उदयनारायण सिंह, जगरनाथपुर गाउँपालिकाका प्रमुख प्रशासकीय अधिकृत सन्देश कुमार यादव, जिराभवानी गाउँपालिकाका प्रमुख प्रशासकीय अधिकृत राज कुशवाहा लगायतकाे पनि उपस्थिती रहेकाे थियाे ।
यसअघि सोमबार पूर्व उद्योग, वाणिज्य तथा आपूर्ति मन्त्री रमेश रिजालसँगै अस्पताल निरीक्षणमा पुगेका अध्यक्ष यादवले मेडिकल वार्डमा एसी जडान गरिदिने प्रतिबद्धता जनाएका थिए । पंखा मात्रै रहेको मेडिकल वार्डमा अत्यधिक गर्मीका कारण बिरामीहरूलाई कठिनाइ भइरहेको देखिएपछि उनले तत्काल पहल गरेका थिए ।
यस्तै, जगरनाथपुरका अध्यक्ष यादवकै आग्रहमा सखुवा प्रसौनी गाउँपालिकाका अध्यक्ष यशवन्त यादवले पनि थप ३ थान एसी उपलब्ध गराउने घोषणा गरेका छन् । ती एसी १–२ दिनमै अस्पतालमा आइपुग्ने अस्पताल विकास समितिले जनाएको छ ।
मंगलबार हस्तान्तरण गरिएको ६ थान एसी ४० शय्याको मेडिकल वार्डमा जडान गरिनेछ । एसी जडान भएपछि उपचाररत बिरामीहरूलाई सहज र सन्तोषजनक उपचार वातावरण मिल्ने अपेक्षा गरिएको छ ।
अस्पताल प्रशासनले स्थानीय तहबाट प्राप्त यस सहकार्यप्रति आभार व्यक्त गर्दै अन्य निकायहरूलाई पनि यस्ता सहानुभूतिपूर्ण योगदानमा सहभागी हुन आग्रह गरेको छ ।
