वीरगंज । लामो समयदेखि खडेरीको चपेटामा परेको पर्सा र बाराका किसानका लागि हालै परेको झरीले आशा र राहतको संचार गराएको छ । यस क्षेत्रका किसानहरूले लगाएका धानबाली सुक्न थालेको अवस्थामा समयमै परेको वर्षाले खेतबारीमा जीवन थपेको छ।
साउन महिनाको मध्यसम्म समेत वर्षा नहुँदा खेतमा पानी सिँचाइ गर्न नसक्ने अधिकांश किसान तनावमा थिए । बिउ छर्ने, रोपाइँ गर्ने समयमा खेत सुक्खा भएपछि धान उत्पादनमा गम्भीर असर पर्ने देखिएको थियो। तर, पछिल्ला शनिबार रातिदेखिको लगातार झरीले खेतमा पानी जम्न थालेपछि किसानहरू खुशी भएका छन् ।
“पानी नपर्दा धानबाली सुक्न थालेको थियो, अब खेतभित्र पानी जम्यो, धानले नयाँ जीवन पायो,” पर्सा जिल्लाको जगरनाथपुर गाउँपालिका निवासी किसान रामसनेही यादवले भने।
बाराको सिमरा, कोल्हवी, पर्साको वीरगंज, जगरनाथपुर, ठोरी, पटेर्वा सुगाैली, पाेखरिया, बहुदरमाई, कालिकामाई, पकहाँ मैनपुर, छिपहरमाई लगायतका अधिकांश क्षेत्रमा भएको वर्षाले मौसमी धानको रोपाइँलाई टेवा पुर्याएको छ ।
कृषि प्राविधिकहरूका अनुसार यदि आगामी केही दिन यस्तै निरन्तर वर्षा भएमा अहिलेसम्मको धान उत्पादन लक्ष्यमा केही राहत मिल्नेछ। स्थानीय तह तथा कृषि कार्यालयहरूले किसानहरूलाई प्राविधिक सहयोग प्रदान गर्नुपर्ने आवश्यकता रहेको कृषिविद्हरूले सुझाव दिएका छन्।
अहिलेको वर्षा किसानका लागि मात्र होइन, समग्र खाद्य सुरक्षाका लागि पनि सुखद संकेत मानिएको छ।
