काठमाडौं । आम जनता पार्टी (आजपा) का अध्यक्ष एवं पूर्वमन्त्री प्रभु साहले बोलबम संस्कृतिले नेपाली समाजलाई गहिरो रूपमा जोड्दै आएको बताउँदै यसको संरक्षणमा सरकार उदासीन रहेको आरोप लगाएका छन् ।
शनिबार काठमाडौंको कालिमाटीमा भोलेनाथ बोलबम काँवरिया संघद्वारा आयोजित विशेष समारोहलाई सम्बोधन गर्दै अध्यक्ष साहले हिन्दु धर्म र संस्कृतिको जर्गेनामा सरकारको भूमिका कमजोर देखिएको बताए । उनले बोलबम संस्कृतिलाई संरक्षण र प्रवर्द्धन गर्न राज्यले पहल गर्नुपर्ने आवश्यकता औंल्याए ।
साहले भने, “बोलबम काँवरियाहरूले आफ्नै खर्चमा हिन्दु धर्म र संस्कृतिको संरक्षण गर्दै आएका छन्, तर सरकारले बजेट विनियोजनसमेत गर्न चासो देखाएको छैन । सरकार अपवाह र प्रचारबाजीमै केन्द्रित भएको देखिन्छ ।”
कार्यक्रममा उनले हिन्दु धर्म जोगाउने काम स्वयं धर्मावलम्बीहरूले गरिरहेको उल्लेख गर्दै धर्म र संस्कृतिमा सरकारले गम्भीरता देखाउनुपर्ने बताए । प्रधानमन्त्री जस्तो गरिमामय पदमा रहेका नेताले हावादारी गफ गरेर हिन्दु धर्मको रक्षा नहुने टिप्पणी गर्दै साहले यस्ता विषयमा तथ्य, प्रमाण र इतिहासका आधारमा प्रस्तुत हुनुपर्ने धारणा राखे ।
प्रधानमन्त्री ओलीमाथि हिन्दु धर्म र संस्कृतिसँग खेलवाड गरेको आरोप पनि साहले लगाए ।
भोलेनाथ बोलबम कावरिया संघका अध्यक्ष राजकुमार साह कलवारको अध्यक्षतामा भएकाे कार्यक्रममा सन्तोष अग्रवाल, त्रिभुवन साह, विपिन जयसवाल, चन्द्रभुषण साह लगायतको विशेष सहभागिता रहेको थियो ।
