वीरगंज । वीरगंजका क्रियाशील पत्रकार क्रान्ति शाहलाई यस वर्षको स्व. ‘सुबोध स्मृति पत्रकारिता पुरस्कार’ प्रदान गरिने भएको छ । फोटो पत्रकार स्व. सुबोध सिंहको सम्झनामा प्रतीक प्रकाशन समूहले स्थापना दिवसका अवसरमा वार्षिक रूपमा प्रदान गर्दै आएको ५१ हजार रुपैयाँ राशिको यो पुरस्कार शाहलाई दिने निर्णय गरिएको हो ।
शनिबार बसेको प्रतीक प्रकाशन समूहको बैठकले अन्नपूर्ण पोस्टका पर्सा जिल्ला संवाददाता तथा मधेस खबर अनलाइन पत्रिकाका अध्यक्ष शाहलाई पत्रकारितामा पुर्याएको योगदानको कदरस्वरूप पुरस्कृत गर्ने निर्णय गरेको हो ।
त्यस्तै, बैठकले उत्कृष्ट स्तम्भकारको रूपमा नेपाल पत्रकार महासंघ पर्साका अध्यक्ष तथा आर्थिक अभियान दैनिकका संवाददाता ओमप्रकाश खनाल र उत्कृष्ट संवाददाताको रूपमा प्रतीक दैनिकका ग्रामिण संवाददाता प्रमोद यादवलाई सम्मान गर्ने निर्णयसमेत गरेको छ।
प्रतीक प्रकाशन समूहका अनुसार आगामी भदौ १ गते हुने प्रतीक दैनिकको वार्षिकोत्सवका अवसरमा तीनै जना पत्रकारलाई औपचारिक रूपमा सम्मान तथा पुरस्कार प्रदान गरिनेछ ।
