जनकपुरधाम । मधेश प्रदेशमा लामो समयदेखि वर्षा नहुँदा उत्पन्न भएको सुख्खा संकट र कृषकहरूको बढ्दो समस्याप्रति प्रदेश सरकार उदासीन भएको आरोप लगाउँदै पाँच विपक्षी दलले मुख्यमन्त्री सतिशकुमार सिंहलाई संयुक्त रूपमा १० बुँदे ध्यानाकर्षण पत्र बुझाएका छन्।
ध्यानाकर्षण पत्र बुझाउने दलहरूमा जनता समाजवादी पार्टी (जसपा) नेपाल, नेकपा माओवादी केन्द्र, नेकपा (एकीकृत समाजवादी), राष्ट्रिय प्रजातन्त्र पार्टी (राप्रपा) र नेपाल संघीय समाजवादी पार्टी रहेका छन् ।
नेताहरूले बुझाएको ध्यानाकर्षण पत्रमा किसानहरूले खेत सुक्दै गएकाले खेती गर्न नपाएको, मल र बीउको अभावले कृषि कार्य ठप्प भएको, तथा पिउने पानीको अभावले आम जनजीवन प्रभावित भएको उल्लेख गरिएको छ । तराई–मधेशलाई प्रदेश सरकारले सुख्खा संकटग्रस्त क्षेत्र घोषणामात्र गरे पनि राहत कार्य भने केवल कागजमै सीमित रहेको उनीहरूको आरोप छ ।
विपक्षी दलहरूले सरकारसमक्ष तत्काल सिँचाइको आपूर्ति सुनिश्चित गर्न, कृषि ऋणमा छुट दिन, मल र बीउको न्यायसंगत वितरण गर्न, खानेपानी समस्या समाधान गर्न, दीर्घकालीन रूपमा चुरे क्षेत्रको संरक्षण गर्न र नदी-नालाहरूको पुनर्निर्माण एवं संरक्षण गर्न आग्रह गरेका छन्।
साथै, किसानका लागि बोरिङ जडान प्रक्रिया सहज बनाउने व्यवस्था गर्न र स्थायी समाधानको पहल नगरे स्थिति गम्भीर बन्ने भन्दै जनआन्दोलनको चेतावनीसमेत दिएका छन् ।
ध्यानाकर्षण पत्र बुझाउने टोलीमा जसपा नेपालका नेता सरोज कुमार यादव, नेकपा माओवादी केन्द्रका युवराज भट्टराई, नेकपा (एकीकृत समाजवादी)का कनिष पटेल, राप्रपाका कञ्चन विच्छा, तथा नेपाल संघीय समाजवादी पार्टीकी विमला अन्सारी तरन्नुम सहभागी थिए।
