वीरगंज। नेपालको द्वन्द्वकालीन इतिहासमा यौन हिंसा पीडित महिलाहरूको आवाजलाई मूलधारको बहसमा ल्याउने उद्देश्यले तयार पारिएको वृत्तचित्र ‘देवी’ को विशेष प्रदर्शनी वीरगंजमा सम्पन्न भएको छ । वीरगंजको आदर्शनगरस्थित क्युएफएक्स सिनेमा
हलमा सामुदायिक संस्था सानो पाइला र चलचित्र पत्रकार संघ नेपाल, पर्साको संयुक्त संयोजनमा विशेष प्रदर्शनी सम्पन्न भएको हो ।
सुबिना श्रेष्ठद्वारा निर्देशित वृत्तचित्र देवी खड्काको जीवनकथामा आधारित छ । जो एक आमासँगै माओवादी युद्धमा होमिएकी एक पूर्व लडाकु, राजनीतिज्ञ तथा यौन हिंसा पीडित पनि हुन् । द्वन्द्वपछिको नेपालमा शक्तिशाली निकायहरूले यौन हिंसाका मुद्दाहरूलाई दबाउने प्रयास गरिरहेको अवस्थामा देवीले ती अनुभवहरू उजागर गर्दै न्यायको खोजीमा यात्रा सुरु गरेको भन्दै विशेष प्रदर्शनी पछि वक्ताहरुले सम्बोधनमा उनको आँटको सह्राना गरे ।
कार्यक्रममा मधेश प्रदेशका प्रदेशसभा सदस्य रहबर अंसारी, नारायणी अस्पताल अन्तर्गत एकद्वार संकट व्यवस्थापन केन्द्र (ओसीएमसी) की इञ्चार्ज हेमा थापा, महिला उद्यमी तथा समाजसेवी गुड्डी जोशी, महिला अधिकारकर्मी डा. सुष्मा तिवारी द्विवेदी, वीरगंज जेसीजका अध्यक्ष सरोज चौरसिया लगायतले वृत्तचित्रका बारेमा आफ्नो धारणा राखेका थिए ।
प्रदर्शनीपछि प्रतिक्रिया दिँदै प्रदेशसभा सदस्य रहबर अंसारीले भने, “हरेक राजनीतिक आन्दोलनमा लुकेका लैंगिक हिंसाका कथा बहिर आउँदैनन् । ‘देवी’ ले ती अन्धकारमा रहेका पीडाहरूलाई उजागर गरेको छ । यस्तो वृत्तचित्रले समाजलाई सोच्न बाध्य बनाउँछ ।”
महिला अधिकारकर्मी डा. सुष्मा तिवारी द्विवेदीले वृत्तचित्रले आफैंभित्र लुकेको साहस देखाएको बताइन् । महिला उद्यमी गुड्डी जोशीले ‘देवी’ जस्ता कथाले समाजमा मौनताको चपेटामा परेका मुद्दाहरूलाई आवाज दिने कार्य गरेको भन्दै सत्यको सँधै जीत हुने जिकिर गरिन् ।
मधेश क्षेत्रमा समेत द्वन्द्वकालको असर परेको छ, तर यहाँका पीडितहरूको आवाज झनै ओझेलमा परेको छ । देवी’ देखाएर यो बहस मधेशसम्म ल्याउने प्रयत्न गरिएको हो।
चलचित्र पत्रकार संघ नेपाल, पर्साका अध्यक्ष सूर्यनारायण वि.क.ले भने, “पत्रकारिताजस्तै वृत्तचित्र पनि समाजको ऐना हो । ‘देवी’ले जुन साहसिक कथन ल्याएको छ, त्यो प्रशंसायोग्य छ । यस्ता वृत्तचित्रहरूले यथार्थको सामना गराउन प्रेरित गर्छन् ।”
वृत्तचित्र प्रदर्शनपछि सहभागीहरूले ‘देवी’ ले ल्याएको कथाले आफैंभित्रको पीडा, सामाजिको उदासीनता र न्यायप्रतिको लडाइँलाई स्पष्ट रूपमा उजागर गरेको बताएका थिए ।
जिल्ला प्रहरी कार्यालय पर्साका प्रमुख प्रहरी उपरीक्षक गौतम मिश्र, सामाजिक अभियन्ता प्रकाश थारु, एनप्याब्सन पर्साका अध्यक्ष रामराज श्रेष्ठ, पटेर्वासुगौली गाउँपालिकाकी उपाध्यक्ष ममता महतो, जनमत पार्टी पर्साका अध्यक्ष ओमप्रकाश सर्राफ, वडा प्रहरी कार्यालय विर्ताका प्रमुख प्रहरी निरीक्षक निरोज चौलागाई, भोजपुरी प्रतिष्ठान वीरगंजकी अध्यक्ष अनिता साह लगायतको उल्लेखनीय उपस्थिति रहेको सामुदायिक संस्था सानो पाइलाका सञ्चालन प्रमुख विवेक कर्ण जानकारी दिए ।
