वीरगंज। नेपाल कम्युनिस्ट पार्टी (एकीकृत समाजवादी) पर्सा जिल्ला कमिटीले देशको समसामयिक राजनीतिक, आर्थिक र सामाजिक समस्याहरूको समाधानका लागि प्रधानमन्त्री केपी शर्मा ओलीलाई २६ बुँदे ज्ञापनपत्र बुझाएको छ । पार्टीको पूर्व निर्धारित कार्यक्रमअनुसार जिल्ला प्रशासन कार्यालय पर्साका प्रमुख जिल्ला अधिकारी गणेश अर्यालमार्फत ज्ञापनपत्र हस्तान्तरण गरिएको हो ।
पार्टी अध्यक्ष बालगोपाल थापाको नेतृत्वमा जिल्ला प्रशासन कार्यालय पुगेको टोलीले पार्टीको झण्डा सहित प्रदर्शन गर्दै ज्ञापनपत्र बुझाएको हो ।
पार्टीका अध्यक्ष थापाकाअनुसार, यो ज्ञापनपत्र पार्टी केन्द्रीय कमिटीको निर्देशनमा देशमा व्यापक रूपले देखिएको सामाजिक, आर्थिक र राजनीतिक बेथितिको अन्त्यको मागसहित बुझाइएको हो । उनले सरकारले जनताको जीवनसँग प्रत्यक्ष सरोकार राख्ने विषयहरूमा चासो नदेखाएको भन्दै जनदबाबमार्फत सुधारको मार्ग खोल्ने उद्देश्यले देशभर अभियान चलाइएको बताए ।
ज्ञापनपत्रमा नेपालको संघीय, लोकतान्त्रिक, गणतान्त्रिक संविधानले समाजवाद उन्मुख राज्यको परिकल्पना गरे पनि व्यवहारमा त्यसको कार्यान्वयन नहुँदा आम जनता निराश बनेको उल्लेख छ । कृषि, उद्योग, रोजगारी, व्यवहारिक शिक्षा, स्वास्थ्य, पारदर्शिता र सुशासनजस्ता महत्वपूर्ण क्षेत्रमा अपेक्षाअनुसारको प्रगति हुन नसकेको भन्दै पार्टीले राज्य संयन्त्रको आलोचना गरेको छ ।
ज्ञापनपत्रमा उद्योगहरूमा नेपाली श्रमिकको स्थान विदेशीहरूले लिइरहेको, किसानहरू मलखाद, सिचाइ र बजार अभावका कारण समस्यामा परिरहेको, व्यापारीहरूमाथि प्रशासनिक आतंक र डरको वातावरण बनाइएको, तथा प्रहरी प्रशासन र ट्राफिक सेवाले जनमैत्री सेवा दिन नसकेको जस्ता विषयहरूमा विशेष ध्यानाकर्षण गराइएको छ ।
यस्तै, वीरगंजस्थित नारायणी अस्पतालमा थन्किएको स्वास्थ्य उपकरणलाई तत्काल सञ्चालनमा ल्याउन, श्रीसिया नदिको प्रदूषण नियन्त्रण गर्दै वातावरणीय गुरु योजना बनाउन, वीरगंज–माडी सडक तथा हुलाकी सडकको निर्माण सम्पन्न गर्न, र निजगढ अन्तर्राष्ट्रिय विमानस्थल, बागमती डाइभर्सन लगायतका आयोजना अगाडि बढाउन सरकारलाई स्पष्ट माग गरिएको छ ।
पार्टीले सामाजिक सद्भाव विथोल्ने गतिविधिलाई नियन्त्रण गर्नुपर्ने, छुवाछुत तथा लघुवित्तद्वारा जनमाथि भइरहेको आर्थिक शोषण अन्त्य गर्नुपर्ने, र वीरगंज महानगरपालिकाले सिपमूलक व्यवसायिक शिक्षालयको स्थापना गर्नुपर्ने जस्ता स्थानीय महत्वका विषयमा समेत माग प्रस्तुत गरेको छ ।
नेकपा (एकीकृत समाजवादी) पर्साले विगतमा भएका राजनीतिक त्रुटिबाट पाठ सिकेर, अब जनतामुखी विकास, न्याय र समाजवाद उन्मुख शासन स्थापनाको लागि जिम्मेवार भूमिका खेल्न तयार रहेको प्रतिबद्धता पनि जनाएको छ ।
सो अवसरमा संविधानसभा सदस्य एवं पार्टीका केन्द्रीय सदस्य रामचन्द्र साह, केन्द्रीय लेखा आयोग सदस्य किशोरी कुशवाहा, उपाध्यक्ष बिक्रम चौरसिया, जिल्ला सचिव गंगा खड्का, तथा अन्य जिल्ला नेताहरू सुवेदार यादव, बृजलाल पासवान, समाजवादी प्रेस संगठन पर्साका अध्यक्ष शम्भु कुमार सुमन, सन्जु चौधरी, उमेश ठाकुर, जोगमाया तमाङ, शान्ता महर्जन, मधु राजपुत, ताकेश्वर चौबे, जयशंकर यादव, शुसिल हजरा, राजकुमार यादव र प्रमोद यादव सहितको टोली जिल्ला प्रशासन कार्यालय पुगेको थियो ।
