वीरगंज । भारतको उडिसा राज्यस्थित कलिंगा इन्स्टिच्युट अफ इन्डस्ट्रियल टेक्नोलोजी (किट) विश्वविद्यालयमा अध्ययनरत नेपाली विद्यार्थी प्रिसा साहको रहस्यमय मृत्यु प्रकरणको निष्पक्ष छानबिनको माग गर्दै अखिल नेपाल राष्ट्रिय स्वतन्त्र विद्यार्थी युनियन (अनेरास्ववियु) वीरगंज महानगर समितिले शुक्रबार पर्सा जिल्ला प्रशासन कार्यालयमा ज्ञापन पत्र बुझाएको छ।
सर्लाही जिल्ला घर भई हाल किट विश्वविद्यालयमा स्नातक तहमा अध्ययनरत २२ वर्षीया प्रिसा साहको अप्रत्याशित मृत्युले विश्वविद्यालयमा अध्ययनरत अन्य नेपाली विद्यार्थीहरूबीच त्रासको वातावरण सिर्जना भएको छ। एक महिनाको छोटो अवधिमा त्यही विश्वविद्यालयमा अध्ययनरत अर्का नेपाली विद्यार्थीको पनि मृत्यु भएको खबर सार्वजनिक भएपछि घटनाको गम्भीरता झनै बढेको हो।
वीरगंज महानगर कमिटीका अध्यक्ष आशिफ अहमदको नेतृत्वमा जिल्ला प्रशासन कार्यालय पुगेको अनेरास्ववियुको टोलीले प्रमुख जिल्ला अधिकारी (सिडिओ) गणेश अर्याललाई ज्ञापन पत्र बुझाउँदै घटनाको निष्पक्ष, पारदर्शी र वैज्ञानिक तरिकाले छानबिन गर्न माग गरेको हो।
ज्ञापनपत्रमा मृतकको परिवारलाई न्याय दिलाउन भारत सरकार, नेपाल सरकार, नेपाली दूतावास तथा सम्बन्धित निकायलाई सक्रिय भूमिका निर्वाह गर्न आग्रह गरिएको छ। साथै, किट विश्वविद्यालयमा अध्ययनरत सम्पूर्ण नेपाली विद्यार्थीहरूको सुरक्षाको प्रत्याभूति दिलाउन र उनीहरूलाई सुरक्षित स्थानमा सार्न आवश्यक पहल गर्न माग गरिएको छ।
छात्रा साहको मृत्युलाई लिएर अनेरास्ववियुले उक्त विश्वविद्यालयमा नेपाली विद्यार्थीहरू सुरक्षित नरहेको ठहर गर्दै भविष्यमा नेपाली विद्यार्थीहरूलाई त्यहाँ पठाउने प्रक्रिया रोकिनु पर्नेमा जोड दिएको छ। साथै, मृत्युको वास्तविक कारण सार्वजनिक गर्न समेत ज्ञापनपत्रमा माग गरिएको छ।
