वीरगंज । नेकपा एमाले वीरगंज महानगर कमिटीको दोस्रो अधिवेशनबाट निर्वाचित नयाँ पदाधिकारी तथा सदस्यहरूको शपथ ग्रहण तथा सम्मान कार्यक्रम बिहीवार वीरगंजको क्लासिक बैंक्वेटमा सम्पन्न भएको छ ।
शपथ ग्रहण कार्यक्रमको प्रमुख अतिथि नेकपा एमालेका सचिव योगेश भट्टराई थिए । उनले आफ्नो सम्बोधनमा निर्वाचनको नतिजा सबैले स्वीकार गर्नुपर्ने, संगठनलाई बलियो बनाउन आन्तरिक एकता आवश्यक रहेको र गुटबन्दीपूर्ण गतिविधिलाई कुनै हालतमा सहन नहुने स्पष्ट पारे । भट्टराईले पार्टीको सिद्धान्त, नेतृत्व र पद्धतिमा कुनै समस्या नरहेको उल्लेख गर्दै अनुशासनको पालना सबैले गर्नुपर्नेमा जोड दिए ।
उनले बजेट निर्माणको सन्दर्भमा प्रधानमन्त्रीसँग मधेश प्रदेशका लागि छलफल भएको जानकारी दिँदै यसपटक प्रदेशमा राम्रो बजेट आउने विश्वास व्यक्त गरे । साथै, आगामी निर्वाचनमा एमालेबाटै प्रतिनिधि चयन गरी प्रतिस्पर्धा गरिने स्पष्ट पारे ।
कार्यक्रममा एमाले स्थायी कमिटी सदस्य तथा मधेश प्रदेश इन्चार्ज लिलानाथ श्रेष्ठले महानगर कमिटीलाई आगामी निर्वाचनमा विजय हासिल गर्ने गरी संगठित रुपमा अघि बढ्न निर्देशन दिए । उनले पार्टीलाई एकतामा बाँधेर अगाडि बढ्नुपर्ने आवश्यकता औंल्याए ।
नेकपा एमाले वीरगंज महानगरका इन्चार्ज विचारी यादवले केही नेताहरूले शपथग्रहण कार्यक्रमको अवमूल्यन गरेको टिप्पणी गर्दै पार्टीभित्र पत्र–पत्रिकाको दुरुपयोग, लेटरप्याड चोरीजस्ता अनधिकृत गतिविधि बढिरहेको उल्लेख गरे र त्यसलाई नियन्त्रण गर्न नेतृत्वले चासो दिनुपर्ने बताए । महानगर अध्यक्ष नवराज शर्माले कार्यक्रममा बोल्दै पार्टी संगठनलाई थप सुदृढ, जिम्मेवार र जनतामुखी बनाउने प्रतिवद्धता व्यक्त गरेका छन् ।
कार्यक्रममा वीरगंज महानगर कमिटीले नगर क्षेत्रका २५५ जना पुराना कम्युनिष्ट नेता, कार्यकर्ता तथा सेल्टरदाताहरूलाई गम्छा र सम्मानपत्रद्वारा सम्मान ग¥यो । साथै नेपाल पत्रकार महासंघको केन्द्रीय लेखा संयोजक के.सी. लामिछाने, मधेश प्रदेश अध्यक्ष श्याम बन्जारा, प्रेस चैतारीका इन्चार्ज अच्युत पौडेल, प्रदेश अध्यक्ष लालबाबु शेख, जिल्ला अध्यक्ष निरञ्जन मिश्र, चिकित्सक डा. प्रमोद सर्राफ र डा. विजय खनाल तथा नर्सिङ क्याम्पसका नव निर्वाचित स्ववियु पदाधिकारीहरूलाई समेत सम्मान गरिएको थियो ।
कार्यक्रममा संघीय मामिला तथा सामान्य प्रशासन मन्त्री राजकुमार गुप्ता, मधेश प्रदेश खेलकुद मन्त्री प्रमोद जैसवाल, एमाले केन्द्रीय सदस्य अरविन्द सिंह, मधेश प्रदेश अध्यक्ष चन्देश्वर मण्डल, वीरगंज महानगरपालिकाका पूर्व प्रमुख विजय कुमार सरावगी लगायतको उल्लेख्य सहभागिता रहेको थियो ।
